Kecha, 26-aprel kuni Toshkent-Istanbul yoʻnalishi boʻyicha HY273 aviaqatnovini amalga oshirayotgan samolyot bortida chaqaloq dunyoga keldi. Bu haqida Uzbekistan Airways matbuot xizmati maʼlum qildi.

1996-yilda tugʻilgan homilador yoʻlovchi Sitora A. Istanbulga yaqinlashib qolgan vaqtda bort kuzatuvchilariga ogʻriq boshlanganini aytgan. Vaziyatni baholagan brigadir yoʻlovchilarga murojaat qilib, ular orasida shifokorlar bor-yoʻqligini va yordam berishlarini soʻragan. Oradan biroz vaqt oʻtib, yoʻlovchi homiladorlikning 28-haftasida oʻgʻil farzandni dunyoga keltirgan.

Samolyot manzilga qoʻnganidan soʻng, Istanbul xalqaro aeroportining tibbiyot xodimlari bortga chiqib, ona va bolaga kerakli yordamni koʻrsatishgan. Ayni vaqtda ularning holati barqaror deya baholanmoqda.

• Uzbekistan airways
• tug'ilish
• xabar