Xabaringiz bor, 2024/2025-o‘quv yilida davlat oliygohlariga o‘qishni ko‘chirish uchun o‘tish ballari tasdiqlab qo‘yilgan bo‘lib, eng yuqori o‘tish bali huquq sohasi uchun belgilangan — 140 balldan iborat bo‘ladi. Shuningdek, sog‘liqni saqlash yo‘nalishida o‘qishini ko‘chirmoqchi bo‘lganlar kamida 129 ball to‘plashi lozim.

Oliy ta’lim, fan va innovatsiyalar vazirligi axborot xizmati rahbari Nazokat Abduqunduzova talabalar o‘qishini ko‘chirish bo‘yicha kelayotgan savollarga javob berdi.

– O‘qishni ko‘chirish uchun qanday hujjatlar tayyorlash kerak?

– O‘qishni ko‘chirish turiga qarab quyidagi hujjatlar ilova qilinishi kerak bo‘ladi. Agar talaba transfer.edu.uz sayti orqali ariza topshirayotgan bo‘lsa, transkript reyting daftarchasi yoki akademik ma’lumotnoma (JPG yoki PDF shakli) va ikkita uzrli sababdan birini asoslovchi hujjat.
my.uzbmb.uz sayti orqali murojaat qilinganda transkript reyting daftarchasi yoki akademik ma’lumotnoma (JPG yoki PDF shakli) taqdim etiladi.

Alohida ta’kidlash lozimki, so‘nggi yillarda oliy ta’limdagi raqamlashtirish natijasida onlayn hujjat topshirish platformalarida shaxsni tasdiqlovchi hujjat talab etilmaydi. Barcha ma’lumotlar OneID tizimi orqali avtomatlashgan holda shakllanadi.

– Yaqinda turmush qurganman, turmush o‘rtog‘im viloyatda yashaydi. Shu sababli o‘qishimni viloyatimga ko‘chirsam bo‘ladimi?

– Davlat oliy ta’lim muassasasining biridan boshqasiga talabalar o‘qishini ko‘chirishga faqatgina ikki holatda ruxsat beriladi.

Birinchisi, bu talaba oila qurishi munosabati bilan turmush o‘rtog‘i doimiy yashaydigan hududdagi oliy ta’lim muassasasiga o‘qishini ko‘chirish uchun murojaat qilganda.

Ikkinchisi, esa davlat organlarining xodimlari ish joyi o‘zgargan taqdirda uning turmush o‘rtog‘i yoki voyaga yetmagan farzandi o‘qishini ko‘chirish uchun murojaat qilganda. Bunda tegishli vazirlik yoki idora rahbarining tavsiyasi talab etiladi.

Demak, bir viloyatdan ikkinchisiga ko‘chirishning 2 ta uzrli sabablaridan biri sizga mos keladi. Shu bois, siz turmush o‘rtog‘ingiz doimiy yashaydigan hududdagi oliy ta’lim muassasasiga o‘qishni ko‘chirish uchun belgilangan muddatlarda murojaat qilishingiz mumkin.

– Ikki yildan beri Qozog‘istonda tahsil olaman. O‘qishimni O‘zbekistonga ko‘chirsam bo‘ladimi?

– Amaldagi tartibga muvofiq, xorijiy mamlakatlarda faoliyat yuritayotgan oliy ta’lim tashkilotlaridan davlat oliy ta’lim muassasalariga talabalar o‘qishni ko‘chirish uchun faqat mos va turdosh ta’lim yo‘nalishlariga hujjat topshiradi hamda maxsus sinov imtihonida ishtirok etib, o‘tish balini to‘plashi talab etiladi.
Bunda talabadan alohida iqtidor talab etiladigan ta’lim yo‘nalishlari bo‘yicha kasbiy (ijodiy) imtihonlar, boshqa ta’lim yo‘nalishlari bo‘yicha test sinovlari o‘tkaziladi.

Test sinovlari va kasbiy (ijodiy) imtihonlar bo‘yicha o‘tish ballari har yili 15-iyulga qadar tizimida oliy ta’lim muassasalari bo‘lgan vazirlik va idoralar tomonidan belgilanib, Bilim va malakalarni baholash agentligining rasmiy veb-saytida e’lon qilinadi.

O‘tish balidan past ball to‘plagan talabalar bakalavriatga qabul qilishdagi tartibga muvofiq tabaqalashtirilgan to‘lov-kontrakt asosida o‘qishga qabul qilinadi. Xorijdan mos va turdosh bo‘lmagan yo‘nalishga o‘qishni ko‘chirishga ruxsat berilmaydi.

– Grant asosida tahsil oladigan talabalar o‘qishni ko‘chirsa, shartnoma asosida ko‘chiriladimi yoki grant saqlanib qoladimi?

– O‘qishning barcha shakllari bo‘yicha oliy ta’limning mos va turdosh yo‘nalishlari hamda mos mutaxassisliklari bo‘yicha davlat grantlari o‘rinlariga ko‘chirishga faqat davlat grantlari asosida tahsil olgan talabalar arizasiga ko‘ra oliy ta’lim muassasalarida tegishli o‘quv yilidagi qabul qilish kvotalarida belgilangan davlat grantlarining soni doirasida ruxsat etiladi. Ya’ni, agar OTM yo‘nalishlari uchun ajratilgan bo‘sh grant o‘rni bo‘lsa, ta’lim muassasasidagi vaziyatdan kelib chiqib, talabaga grant asosida o‘qishni ko‘chirishga ruxsat berilishi mumkin.

–Talaba xorijiy tillar fakulteti xorijiy til va adabiyoti (ingliz) yo‘nalishida 1-kursni tamomladi. Shu yo‘nalishda sirtqi ta’lim mavjud bo‘lmagani sababli u o‘qishini boshqa universitetning ingliz filologiyasi yoki tarjima nazariyasi yo‘nalishining sirtqi ta’limiga o‘qishini ko‘chirishi mumkinmi?

– Buning imkoni yo‘q, boisi talabada davlat oliy ta’lim muassasasining biridan boshqasiga talabalar o‘qishini ko‘chirish uchun asos bo‘ladigan ikkita uzrli sababdan biri bo‘lishi kerak. Bu murojaatchida keltirilmagan. Bundan tashqari, filologiya yo‘nalishlarida sirtqi ta’lim mavjud emas.

– Qachondan boshlab ta’lim shaklini sirtqiga ko‘chirish uchun ariza topshirsa bo‘ladi? Arizani onlayn topshirish mumkinmi?

– Ta’lim shaklini o‘zgartirish yuzasidan murojaatlar transfer.edu.uz sayti orqali joriy yil 15-iyuldan 5-avgust kuniga qadar onlayn qabul qilinadi. Bunda talaba tahsil olayotgan yo‘nalish bo‘yicha OTM ichki imkoniyati va sirtqi ta’lim shakli mavjud bo‘lganda uning arizasi qanoatlantirilishi mumkin.