Buyuk Britaniyaning London shahridagi Emirates Stadium majmuasida shaxmat bo‘yicha London Chess Classic 2025 turnirining 8-tur o‘yinlari o‘tkazildi. Mukofot jamg‘armasi 50 ming funt sterlingni tashkil etuvchi ushbu nufuzli musobaqada dunyoning eng kuchli 10 nafar shaxmatchilari qatorida o‘zbekistonlik grossmeyster Nodirbek Abdusattorov ham bosh sovrin uchun kurash olib bordi. Birinchi turda britaniyalik shaxmatchi Gavayn Jons bilan durang o‘ynagan Abdusattorov ketma-ket oltita o‘yinda g‘alaba va bitta bahsda durangga erishdi hamda muddatidan avval musobaqa g‘olibligini qo‘lga kiritdi.

Abdusattorov 8-turda eng yaqin ta’qibchi va musobaqada birinchi raqam ostida saralangan fransiyalik Alireza Firuzjaga qarshi qora donalarda bahs olib bordi va durang qayd etdi. Shu tariqa shaxmatchi 8 imkoniyatdan 7 ochko jamg‘argan holda musobaqa yakunlanishiga bir tur qolganda chempionlikni rasmiylashtirdi.

Ma’lumot uchun, Nodirbek Abdusattorov FIDE Jahon kubogidagi muvaffaqiyatsiz ishtirokidan so‘ng 18,4 reyting ochkolarini yo‘qotgan bo‘lsa, London Chess Classic turniridagi g‘alabadan so‘ng reytingini 20 ochkoga yaxshiladi va onlayn jadvalida 22-o‘rindan 12-o‘ringa ko‘tarildi.

• FIDE
• London
• Nodirbek Abdusattorov
• Shaxmat