Venesuelalik 112 yoshli Xuan Vinsente Mora dunyodagi eng keksa erkak deb topildi. Uning ismi Ginness rekordlari kitobida rasman qayd etilgan.

Xuan Vinsente Mora 1909-yilning 27-may kunida koʻp farzandli oilada tavallud topgan, uzoq yillar davomida fermer boʻlib ishlagan. Oʻziga tegishli boʻlgan oxirgi yer hududini 104 yoshida sotib yuborgan. 1937-yilda uylangan, rafiqasi 1997-yilda vafot etgan. Rekordchining 11 nafar farzandi, 41 ta nabirasi, 18 ta chevarasi va 12 ta evarasi bor. Rekordchi bir necha kundan keyin 113 yoshni qarshilaydi.

Xuan Moraning aytishicha, har tongni qahva bilan qarshi olishni, oila aʼzolari bilan birgalikda nonushta qilishni yaxshi koʻradi. Yaqinlarini ham tong saharda uygʻonish va ishni ertaroq boshlashga undaydi.

Xuan Vinsente Mora oʻzidan avvalgi rekordchi – ispaniyalik Saturnino de la Fuente Garsiyaning vafotidan keyin Yer sayyorasining eng keksa erkak deb tan olingan. Fuente Garsiya joriy yilning 18-yanvar kuni 112 yoshida vafot etgandi.

• qiziqarli
• rekord