Rossiya prezidenti Vladimir Putin seshanba kuni Moskvada Kuba prezidenti Migel Dias-Kanel Bermudes bilan uchrashadi.

Keltirilishicha, ikki davlat rahbarlari xalqaro kun tartibidagi asosiy masalalar yuzasidan fikr almashishi hamda siyosiy, savdo-sotiq va Rossiya-Kuba strategik sherikligining hozirgi holati va uni yanada rivojlantirish istiqbollarini muhokama qilishadi.

Kreml matbuot kotibi Dmitriy Peskov Kuba Rossiya Federatsiyasining o‘ta muhim hamkori ekanligini va prezidentlar “ko‘p narsa haqida gaplashishi”ni ta’kidladi.

Joriy yilning 22-noyabr sanasida prezidentlar Moskva shimolida Fidel Kastro haykali ochilish marosimida ham qatnashadi.
Bu yil Rossiya va Kuba prezidentlari yiliga ikki marta - yanvar va oktyabrda telefon orqali gaplashgan.

Dushanba kuni Kuba prezidenti Rossiya Federatsiyasi Xavfsizlik kengashi raisi o‘rinbosari Dmitriy Medvedev bilan uchrashganida, Rossiya va Kuba uchun G‘arb tomonidan joriy etilgan sanksiyalar doirasida muloqotni davom ettirish va tajriba almashish foydali ekanini ta’kidladilar.

Medvedev hech qanday sanksiyalar Kuba va Rossiya Federatsiyasining rivojlanishini to'xtata olmasligini alohida ta’kidlagan.
Ma’lumot uchun, Migel Dias-Kanel Bermudes 19 noyabr kuni Moskvaga keldi. Kuba Prezidenti Rossiyaga safari Gavana va Moskva o‘rtasidagi o‘zaro manfaatli sohalardagi hamkorlikni mustahkamlashga yordam berishiga ishonch bildirgan. Kuba rahbari xorijiy safari davomida Jazoirga ham tashrif buyurgan, Rossiyadan keyin Turkiya va Xitoyga borish niyatida.

• AQSh
• Kuba
• Rossiya