“Xabbl” teleskopi “Bootes” yulduz turkumidagi uchta galaktikaning yaqinlashishini aks ettiruvchi yangi suratni Yerga yubordi.

Qayd etilishicha, ularning trayektoriyasi muqarrar ravishda to‘qnashuv va birlashishga olib keladi. Bu haqda “Space” nashri xabar berdi.

Garchi bu tez-tez sodir bo‘lsa-da, ushbu hodisa juda kam uchraydigan voqelik, chunki uchta galaktikaning har biri hozirda yangi yulduzlarni yaratish jarayonida bo‘lgan.

Galaktikalar bir-biridan atigi 50 000 yorug‘lik yili (ya’ni yorug‘lik tezligi 50 000 yilda bosib o‘tadigan masofa) uzoqlikda joylashgan. Garchi bu juda ulkan masofadek tuyulsa ham, kosmik nuqtai nazardan bu juda yaqin ekanini anglatadi. Taqqoslash uchun: Somon yo‘liga eng yaqin galaktika – “Andromeda” quyosh sistemasidan 2,4 – 2,7 million yorug‘lik yilidan ko‘proq masofada joylashgan (ularning birlashishi faqat 4 milliard yildan keyin bashorat qilinadi).

Olimlarning ta’kidlashicha, har uchala galaktikaning shakllari allaqachon buzilgan, ularni bog‘lab turgan gaz va chang filamentlari (to‘plam) ko‘rinadi hamda ular o‘zidan katta miqdorda yorug‘lik chiqaradi – bularning barchasi yaqinlashib kelayotgan to‘qnashuvga ishora qiladi.

“Xabbl” teleskopidan olingan ushbu surat astronomlar “Eng yorqin klaster galaktikalari” (BCG) deb ataydigan koinotdagi eng katta va eng massiv yulduz tizimlarining kelib chiqishini o‘rganish dasturining bir qismidir. “SDSSCGB10189”ning (ilmiy belgilanishi) birlashishi yangi galaktika “tug‘ilishiga” olib kelishi mumkin. Olimlar bu holat ularning paydo bo‘lish siriga oydinlik kiritishiga umid qilmoqda.

Ma’lumotlarga ko‘ra, so‘rovlar uchun ilg‘or texnika “Xabbl” kamerasi bo‘lib, asosan ko‘rinadigan yorug‘lik diapazonida ma’lumotlarni suratga olish uchun ishlatiladi, bu inson ko‘zi bilan bir xil diapazon hisoblanadi. U 2002-yilda teleskopga o‘rnatilgan.

• Galaktika
• Olimlar
• Teleskop