Mamlakatning ijobiy imiji har bir davr va zamonda kerak bo‘ladi. 21-asrga kelib samarali xalqaro munosabatlarni o‘rnatish uchun mamlakatning ijobiy qiyofasini shakllantirish har qanday zamonaviy davlatning strategik vazifasiga aylandi. Shiddat bilan rivojlanayotgan zamonaviy dunyoda mamlakat boshqa davlatlar bilan iqtisodiy, ijtimoiy, madaniy, ilmiy-texnikaviy ta’lim va axborot sohalarida hamkorlik qilmay turib rivojlana olmaydi. Davlatning imiji esa bevosita ushbu omillarning amalga oshishida sezilarli ro‘l o‘ynaydi. Mana shunday ijobiy imijlar qaysidir ma’noda davlatga o‘zga yurt vakillarida investitsiyalar kirishida juda muhim hisoblanadi.

Davlatning imijini yaratishda asosan uning tabiiy omillari, tarixi, madaniyati, geografik joylashuvi, iqtisodiy va inson resurslarining mavjudligiga e’tibor qaratish lozim. Mamlakatning ijobiy imiji uning raqobatbardoshligi, muvaffaqiyatliligi, barqarorligi, ichki va tashqi bozordagi darajasini belgilaydi. Shunday jihatlarga asoslanib davlat o‘zgalarning e’tibor va ishonchiga erishadi. Bu esa nafaqat ichki va tashqi iqtisodiyotda balki mamlakatlar aloqalarida ham muhim hisoblanadi. O‘zbekistonning sobiq Tashqi Ishlar vaziri Abdulaziz Komilov shunday deydi: “Tasvir - davlatning ichki tashqi siyosatidir. Tasvir yaratish juda qiyin, har kuni davlatning kuchli imijini yaratish uchun kuchli harakat qilish kerak”. Bu esa xuddi qurilishda uyni jozibali va mustahkam qurishga o‘xshaydi, ya’ni davlat imijini yaratish juda katta siyosatni amalga oshirish demakdir.

O‘zbekistonning ijobiy imiji asosan nimalarda ko‘rinadi?

1. Mehmondo‘st davlat sifatida ijobiy imij yaratilgan;

2. Turizm sohasida ham tarixiy obidalarimiz to‘laqonli bo‘lmasa-da, davlatning ijobiy imiji hisoblanadi. Bu jihatni rivojlantirishga alohida e’tibor qaratish lozim.

3. Doimiy ravishda o‘z fuqarolarini himoya qiladi. (Suriyadagi ayollarning va chet elda qarovsiz qolgan o‘zbekistonlik bolalarning yurtiga qaytarilishi);

4. O‘zbekiston qo‘shni mamlakatlar bilan doimiy yaxshi aloqada ekanligi. Zarur hollarda madaniy va gumanitar yordamlar qabul qiladi va jo‘natadi.

O‘zbekistonning salbiy imiji nimalarda aks etgan?

1. Turizm maqsadida kelganlar o‘z ijtimoiy sahifalarida transportni xususan, poyezdlarni tanqid ostiga olib yozgani. Bu salbiy imij yaratilishiga sabab bo‘ladi. Chunki ushbu sayohatchilarning bloglarida minglab balki, millionlab obunachilari bor.

2. Toshkentning ekologik vaziyati: havoning ifloslanishi (doimiy ravishda havosi iflos shaharlar reytingida yuqori o‘rinlarda turadi).

3. Butunjahon iqtisodiy forum Raqobatbardoshlik indeksi eng yaxshi va yomon yo‘llarga ega mamlakatlar reytingiga O‘zbekistonni kiritmagan.

Bunday ko‘rsatkichlarda mamlakatning yuqori reytinglarda aks etmagani esa o‘zga davlatlar tasavvurida salbiy fikrlarni keltirib chiqaradi. Shundan kelib chiqib davlat haqida umumiy tushunchalar shakllanadi. Bu tushunchalarga tayanib investitsiya kiritilmasligi yoki kechiktirilishi mumkin. Albatta, davlatlar sarmoya kiritishdan avval davlatning avtoyo‘llariga va boshqa jihatlariga e’tibor qaratishi tabiiy.

Quvonarlisi esa xorijda maqsadli targ‘ibot tadbirlarini tashkil etish masalasi e’tibordan chetda qolmagan. Ayniqsa, so‘nggi yillarda “O‘zbekiston madaniyat kunlari”, davra suhbatlari, ko‘rgazmalar va festivallar o‘tkazish bilan bog‘liq tashkiliy ishlarga alohida e’tibor qaratilgan. Shuningdek, vatandoshlar ishtirokida O‘zbekiston Respublikasining xalqaro maydondagi imijini oshirishga qaratilgan tadbirlar tashkil etish rejalashtirilgan. Bularning barchasi yurt kelajagi va yangi marralar uchun xizmat qilishi tabiiy. Axir aytishadi-ku, “Onangni otangga bepardoz ko‘rsatma”, deb. Shunday ekan, biz ham bor imkoniyatlarimizni ko‘rsatib berishimiz zarur, albatta.
                                                                                                                                             Maqola muallifi: Olimjanova Gulzoda

• Investitsiya
• Ta'lim
• savdo