AQSh, Meksika va Kanada maydonlarida bo‘lib o‘tadigan 2026-yilgi futbol bo‘yicha Jahon chempionati taqvimi hamda uchrashuvlar o‘tkaziladigan stadion nomlari ma’lum bo‘ldi. Unga ko‘ra, O‘zbekiston terma jamoasi guruh bosqichidagi ilk o‘yinini Meksikada o‘tkazsa, qolgan ikki turni AQShdagi stadionlarda o‘tkazadi.

“Oq bo‘rilar” ilk turda Kolumbiyaga qarshi maydonga tushadi. Bu uchrashuvga Meksika poytaxtidagi “Atsteka” stadioni mezbonlik qiladi. Ikkinchi turda Krishtianu Ronaldu boshchiligidagi Portugaliya bilan o‘ynaydi. Mazkur bellashuv AQShdagi “NRG” stadionida o‘tadi. Fabio Kannavaro jamoasi oxirgi turdagi uchrashuvni Atlantadagi “Mersedes Benz” stadionda o‘tkazadi.

1-tur. 17-iyun | O‘zbekiston - Kolumbiya (“Atsteka” stadioni. Mexiko).

2-tur. 23-iyun | Portugaliya - O‘zbekiston (“NRG” stadioni. Hyuston).

3-tur. 27-iyun | Kongo/Yamayka/Yangi Kaledoniya - O‘zbekiston (“Mersedes Benz” stadioni, Atlanta).

Eslatib o‘tamiz, 5-dekabr, juma kuni Jahon chempionati guruh bosqichiga qur’a tashlandi. Unga ko‘ra, O‘zbekiston “K” guruhidan joy oldi. Fabio Kannavaro boshchiligidagi jamoaga Portugaliya, Kolumbiya hamda qit’alararo pley-off g‘olibi (Kongo – Yamayka/Yangi Kaledoniya) raqiblik qiladi.

• Futbol
• Jahon chempionati
• O‘zbekiston