Xorazm va Surxondaryo viloyatida fuqarolarga uy-joy qurish uchun yer maydonlari olib berishni va’da qilgan va boshqa bir fuqaroning yerini o‘ziniki deb sotayotgan firibgarlar ushlangan. Bu haqida Iqtisodiy jinoyatlarga qarshi kurashish departamenti xabar berdi.

Ma’lum bo‘lishicha, departament hamda DXXning Hazorasp tuman bo‘limlari tomonidan fuqarolarning huquq va manfaatlarini himoya qilish yuzasidan o‘tkazilgan tezkor tadbirda, fuqaro D.R. fuqaro O. ga uy-joy qurish uchun aslida tuman hokimligi zaxirasida bo‘lgan 6 sotix ekin yerni o‘ziniki ekanligini aytib, ushbu yer uchastkasini firibgarlik yo‘li bilan 10 500 AQSh dollariga sotgan vaqtida ashyoviy dalillar bilan ushlangan.

Shu kabi, Departamentning Surxondaryo viloyati Qiziriq tuman bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tezkor tadbirda, fuqaro F.Q. “S.C.” MCHJga tegishli 8 sotix yer maydonini, fuqaro A.ga tanishlari orqali rasmiylashtirib olib berish evaziga 20 mln so‘mni olgan vaqtida ashyoviy dalillar bilan ushlangan.

Ta’kidlanishicha, mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Firibgarlik
• Jinoyat
• Surxondaryo
• Xorazm