Toshkent viloyatida qurilishi rejalashtirilgan Yangi Toshkent xalqaro aeroporti hududida joylashgan 7 ta qabriston ko‘chiriladi. Bu haqda viloyat hokimining 15-sentyabrdagi qarorida belgilangan.

Qarorga ko‘ra, aeroport qurilishi hududida joylashgan va faoliyati to‘xtatilgan quyidagi qabristonlar ko‘chiriladi.

Quyi Chirchiq tumanida:

“Sergeli” MFYdagi “Sergeli bolalar” qabristoni;

“Sergeli” MFYdagi “Koreys” qabristoni.

O‘rta Chirchiq tumanida:

“Yangiyo‘l” MFYdagi “Suvon bag‘ish” musulmon qabristoni;

“Yangiyo‘l” MFYdagi “Qudoyqul” musulmon qabristoni;

“Yangiyo‘l” MFYdagi “Qudoyqul” koreys qabristoni;

“Yangiyo‘l” MFYdagi “Sariktepa” koreys qabristoni;

“Yangiyo‘l” MFYdagi “Boris” rus xristian qabristoni.

Hujjatda qayd etilishicha, O‘zbekiston musulmonlari idorasining xulosasiga ko‘ra, ayrim qabrlardagi marhumlar jasadlari tuproqqa aylangan bo‘lishi mumkin. Bunday holatlarda hududdan belgilangan tartibda foydalanishga ruxsat etiladi.

Qabristonlarni ko‘chirish jarayonida qabrlar ochilganda suyak qoldiqlari aniqlansa, ular ehtiyotkorlik va hurmat bilan yig‘ilib, boshqa qabristonlarga qayta dafn etiladi. Barcha ishlar sanitariya-epidemiologiya, ekologiya, arxitektura, diniy va jamoatchilik talablariga rioya qilgan holda amalga oshirilishi belgilangan.

Ko‘chiriladigan qabristonlar o‘rniga quyidagi qabristonlardan foydalaniladi:

Quyi Chirchiq tumanida:

“Sergeli” MFYdagi “Shardara” qabristoni;

“Sergeli” MFYdagi rus-koreys qabristoni.

O‘rta Chirchiq tumanida:

“Taraqqiyot” MFYdagi koreys qabristoni;

“Yangiyo‘l” MFYdagi “Zaynab ona” qabristoni.

Sanitariya-epidemiologiya osoyishtalik va jamoat salomatligi boshqarmasi eksgumatsiya hamda qayta dafn qilish ishlari sanitariya qoidalariga muvofiq bajarilishi ustidan nazorat olib boradi.