Fukusima, Miyagi va Yaponiyaning boshqa prefekturalari aholisi shikastlangan “Fukusima-1” atom elektr stansiyasidan radioaktiv suvning okeanga oqizilishi yuzasidan davlat va energetika kompaniyasi Tokyo Electric Power (TEPCO) ustidan sudga murojaat qildi. Bu haqda Kyodo agentligi xabar berdi.

Da’vo Fukusima tuman sudiga 150 ga yaqin odam nomidan berilgan. Ular damping ishini to'xtatishni talab qilmoqdalar. Shuningdek, ularning fikricha, tozalangan suvning oqizilishi fuqarolarning tinch-osoyishta hayotga bo‘lgan huquqini poymol etib, baliqchilik sohasi bilan shug‘ullanuvchi ishchilarga salbiy ta’sir ko‘rsatmoqda.

2011-yil mart oyida sodir boʻlgan sunami tufayli Fukusima-1 AESda elektr taʼminoti va sovutish tizimlari ishlamay qolgan, natijada uchta reaktorda yadro yoqilgʻisi erishi, portlashlar va atmosferaga radiatsiya chiqishi bilan birga kelgan. Keng hududlar ifloslangan, ulardan o'n minglab odamlar evakuatsiya qilingan. Reaktorlarni sovutish uchun suv ishlatilgan, uning hajmi tufayli saqlash qiyin bo'lgan (tanklarda taxminan 1,34 million tonna to'plangan). 2021-yilning aprel oyida Yaponiya hukumati okeanga sezilarli miqdorda suv oqizib yuborishga ruxsat berdi, u asosan radioaktiv moddalardan xoli, ammo tarkibida tritiy (vodorodning radioaktiv izotopi) mavjud. 2024-yilning 31-martiga qadar AESdan 31,2 ming tonnaga yaqin ana shunday suvni oqizish rejalashtirilgan.

Joriy yilning 24-avgust kuni TEPCO okeanga suvning birinchi partiyasini chiqarishni boshladi.

Tokioning qarori bir qator davlatlar, birinchi navbatda, Xitoy tomonidan keskin tanqidga sabab bo'ldi. Xitoy Xalq Respublikasi Bosh bojxona boshqarmasi 24-avgustdan boshlab Yaponiyadan dengiz mahsulotlari importini butunlay to‘xtatdi.

• AES
• Yaponiya