Bosh prokuratura huzuridagi Departamentning Angren shahar bo‘limi va boshqa huquqni muhofaza qiluvchi organlar hamkorligida o‘tkazilgan tezkor tadbirda fuqaro A.Ya. fuqaro T.F.ga “Sog‘lom” MFY hududidagi davlat zaxirasidagi 30 sotix yer maydonini sotishini va uni kadastr idorasidagi tanishlari orqali rasmiylashtirib berishini va’da qilib, 55 000 AQSh dollarini olgan vaqtida ushlandi.

Departamentning G‘ijduvon tumani bo‘limi tomonidan o‘tkazilgan tezkor tadbirda “R.M.” fermer xo‘jaligi rahbari X.M. 45,6 gektar yer maydonining 2,7 gektar qismini 36 000 AQSh dollari evaziga fuqaro U.A. nomiga rasmiylashtirib berishni va’da qilib, 32 000 AQSh dollarini olgan vaqtida ushlandi.

Departamentning Surxondaryo viloyati boshqarmasi tomonidan o‘tkazilgan tadbirda Angor tumanidagi “J.Y.” fermer xo‘jaligi rahbari P.T. 7,7 gektar yer maydonini 800 mln so‘m evaziga sotishni va’da qilib, oldindan 520 mln so‘mni firibgarlik yo‘li bilan olgani aniqlanib, qolgan 280 mln so‘mni olgan vaqtida ushlandi.

Departamentning Farg‘ona viloyati boshqarmasi tomonidan o‘tkazilgan tezkor tadbirda “D.B.” fermer xo‘jaligi rahbari P.T. 83,4 gektar yer maydonidan 39 gektarini fuqaro A.Ya. nomiga rasmiylashtirib berishni va’da qilib, 23 000 AQSh dollarini olgan vaqtida ushlandi.

Departamentning Ishtixon tumani bo‘limi tomonidan o‘tkazilgan tezkor tadbirda “Ch.Q.” fermer xo‘jaligi rahbari A.T. 6 gektar yer maydonini 360 mln so‘m evaziga sotishni va hujjatlarni rasmiylashtirib berishni va’da qilib, 200 mln so‘mni olgan vaqtida ushlandi.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.