Astronomlar Yer orbitasida aylanuvchi va avval fanga maʼlum boʻlmagan asteroidni kashf qilishdi. Olimlarning aytishlaricha, uni Yer sayyorasining yangi yoʻldoshi deb atash mumkin.

Asteroidga 2023 FW13 deya nom berilgan boʻlib, uning diametri 10-20 metrga teng. Obyekt Gavayi orollaridan turib “Pan-STARRS” teleskoplar tarmogʻi yordamida kashf etilgan.

Aniqlanishicha, asteroid Yer bilan 1:1 nisbatdagi tezlikda aylanadi. U sayyora yoniga miloddan avvalgi 100 yilda yetib kelgan va prognozlarga koʻra, bu yerda 3700-yilga qadar qolishi mumkin. Bu Yerning vaqtinchalik yoʻldoshi sifatida uning orbitasida aylanadigan asteroidlar uchun rekord koʻrsatkich hisoblanadi.

Olimlar asteroid aslida Yer sayyorasining emas, Quyoshning atrofida aylanayotgan boʻlishi mumkinligini ham aytib oʻtishgan. Shu boisdan astronomlar 2023 FW13 asteroidini kuzatishda davom etadilar.

• ilm-fan
• qiziqarli