Shavkat Mirziyoyevning 2022-yil 8-iyundagi “Ikkinchi jahon urushi qatnashchilari va faxriylarining moddiy taʼminotini yaxshilash hamda yolg‘iz keksalar va nogironligi bo‘lgan shaxslarni qo‘llab-quvvatlash tizimini yanada takomillashtirish to‘g‘risida”gi qaroriga muvofiq, 1941–1945-yillardagi urush faxriylari va fashistlar kontslagerlarining voyaga yetmagan sobiq mahbuslari va Leningrad shahri qamal qilingan davrda ishlagan fuqarolarga, shuningdek, o‘zgalar parvarishiga muhtoj bo‘lgan yolg‘iz keksalar va nogironligi bo‘lgan shaxslarga bepul yetkazib beriladigan oziq-ovqat mahsulotlari hamda gigiena tovarlari o‘rniga har oyda bazaviy hisoblash miqdorining bir baravari miqdorida qo‘shimcha toʼlov (2022-yil 1-iyun holatiga 300 000 so‘m) to‘lab borilishi belgilangan.

Moliya vazirligi huzuridagi budjetdan tashqari Pensiya jamg‘armasi Tibbiy-ijtimoiy xizmatlarni rivojlantirish agentligi tomonidan o‘zgalar parvarishiga muhtoj bo‘lgan yolg‘iz keksalar yoki nogironligi bo‘lgan shaxslar to‘g‘risida taqdim etilgan maʼlumotlarga asosan, joriy yilning iyun oyi uchun 3 758 nafar fuqarolarga to‘lov qaydnomalari shakllantirilib O‘zbekiston Respublikasi aksiyadorlik tijorat Xalq banki va boshqa tijorat banklariga yetkazildi va 28-iyun holatiga 3 722 nafarga yoki 99 foiz to‘lovlar amalga oshirildi. Joriy yil iyun oyida vaqtincha uyida yo‘qligi sababli to‘lanmasdan qaytarilgan 36 nafar fuqarolarga qo‘shimcha to‘lov mablag‘lari iyul oyi to‘lovlariga qo‘shib yetkaziladi.

• Ikkinchi jahon urushi
• Keksalar
• pensiya