Kecha, 11-avgust kuni Rossiya qo‘shinlari nazoratida bo‘lgan Zaporoje atom elektr stansiyasining sovitish minorasida yong‘in sodir bo‘lgan. Bu haqda Zaporoje viloyatining bosib olingan qismiga Rossiya tomonidan tayinlangan rahbar Yevgeniy Balitskiy ma’lum qildi.

“Ukraina Qurolli kuchlari tomonidan Energodar shahrining o‘qqa tutilishi oqibatida Zaporoje AES sovitish tizimlari inshootida yong‘in sodir bo‘ldi”, – deb yozdi u o‘zining ijtimoiy tarmoqdagi sahifasida.

Uning ta’kidlashicha, AESning barcha 6 ta energobloklari hamon sovuq to‘xtash rejimida va “bug‘ning portlashi yoki boshqa oqibatlar xavfi yo‘q”, shuningdek, Zaporoje AES va Energodar shahri atrofidagi radiatsiyaviy fon normal saqlanib qolgan.

Biroq Ukraina prezidenti Vladimir Zelenskiy o‘z Telegram kanalida Zaporoje atom elektr stansiyasi binosi tepasida tutun ko‘tarilayotgani aks etgan video tasvirlarni e’lon qildi.

Ukraina yetakchisi yong‘inni rus harbiylari boshlaganini da’vo qilmoqda. Shu bilan birga, uning so‘zlariga ko‘ra, AES hududida radiatsiya ko‘rsatkichlari hozircha normal holatda.

Ukrainaning Nikopol okrugi harbiy ma’muriyati rahbari Yevgeniy Yevtushenkoning yozishicha, rossiyaliklar sovitish minorasida ko‘p sonli avtomobil shinalarini yoqib yuborishgan.

• Rossiya
• Ukraina