2019-yil 29-iyul – 15-avgust kunlari kunduzgi, sirtqi va kechki ta’lim shakllari bo‘yicha oliy ta’lim muassasalarining bakalavriat yo‘nalishlariga kirish test sinovlari respublikaning 60 ta oliy ta’lim muassasalari va ularning 30 ta filiallarida ro‘yxatdan o‘tgan abituriyentlar uchun 66 ta katta sig‘imli binolarda o‘tkazildi. Tanlov yakunlari bo‘yicha natijalar bir hafta muddat ichida taqdim etiladi, deyilmoqda DTM xabarida.

Kunduzgi, kechki hamda sirtqi ta’lim shakli uchun oliy ta’lim muassasalariga abituriyentlar tomonidan jami 1 066 925 ta ariza (tanlov bir o‘zinga 10,28 ni tashkil qildi) (2018-yilda – 814 952 ta) qabul qilindi, shundan:
– kunduzgi, kechki ta’lim shakllariga 731 918 ta;
– sirtqi ta’lim shakliga 335 007 ta ariza tushdi.

Test sinovlarida 979 470 nafar abituriyentning ishtirok etishi rejalashtirilgandi.
Test sinovlarini topshirgan 954 075 nafar abituriyentning test sinovi natijalari hisoblandi, jumladan:
– kunduzgi, kechki ta’lim shakllarida – 660 773 nafar;
– sirtqi ta’lim shaklida – 293 302 nafar. 

Test sinovlarida 24 930 nafar abituriyent qatnashmagan. Shundan: 
– 16 913 nafari kunduzgi, kechki ta’lim shakli; 
– 8 017 nafari sirtqi ta’lim shaklidan.

Qoida buzgani sababli 465 nafar abituriyent test sinovlaridan chetlashtirilgan.

Eng yuqori ballar (189.0 ball) 11 ta oliy ta’lim muassasasining 14 ta ta’lim yo‘nalishida kuzatildi, jumladan: 
– Toshkent davlat o‘zbek tili va adabiyoti universitetining O‘zbek-ingliz tarjima nazariyasi va amaliyoti ta’lim yo‘nalishida;
– O‘zbekiston davlat jahon tillari universitetining Xorijiy til va adabiyoti: ingliz tili, Filologiya va tillarni o‘qitish: ingliz tili va nemis tili ta’lim yo‘nalishida;
– Toshkent moliya institutining Iqtisodiyot (tarmoqlar va sohalar bo‘yicha) va Moliya ta’lim yo‘nalishlarida; 
– Qarshi davlat universitetining Filologiya va tillarni o‘qitish: o‘zbek tili ta’lim yo‘nalishida;
– Qoraqalpoq davlat universitetining Yurisprudensiya (faoliyat turlari bo‘yicha) ta’lim yo‘nalishida;  
– Jahon iqtisodiyoti va diplomatiya universitetining Xalqaro iqtisodiyot va menejment (mintaqalar va faoliyat yo‘nalishlari bo‘yicha) ta’lim yo‘nalishida;
– Buxoro tibbiyot institutining Davolash ishi (Buxoro) ta’lim yo‘nalishida;
– Samarqand tibbiyot institutining Davolash ishi (Qashqadaryo) ta’lim yo‘nalishida;
– Toshkent tibbiyot akademiyasining Davolash ishi (Sirdaryo) ta’lim yo‘nalishida;
– Qarshi muhandislik-iqtisodiyot institutining Iqtisodiyot (tarmoqlar va sohalar bo‘yicha) ta’lim yo‘nalishida; 
– Toshkent davlat yuridik universitetining Yurisprudensiya (faoliyat turlari bo‘yicha) ta’lim yo‘nalishida kuzatildi.

Eng yuqori ballar kirish imtihonlari 4 ta fandan iborat bo‘lgan Toshkent davlat o‘zbek tili va adabiyoti universitetining O‘zbek tili va adabiyoti ta’lim yo‘nalishida (232.1 ball), Filologiya va tillarni o‘qitish: o‘zbek tili ta’lim yo‘nalishida (238.6 ball) qayd etilgan.