Rossiyada ota-ona qarovisiz qolgan oʻzbekistonlik bolalar ortga qaytarildi. Bu haqda Ijtimoiy himoya milliy agentligi xabar berdi.

Ma’lum qilinishicha, Rossiya Federatsiyasi hududida ota-onasining qaramogʻisiz qolgan voyaga yetmaganlarni vatanga qaytarish boʻyicha amalga oshirilgan xizmat safari doirasida agentlik va tegishli tashkilotlar hamkorligida 14 nafar voyaga yetmagan bola Oʻzbekistonga olib kelingan.

Bolalar Toshkent shahridagi Islom Karimov nomidagi xalqaro aeroport orqali mamlakatga yetib kelgach, belgilangan tartibda vaqtincha Toshkent shahar IIBB huzuridagi Voyaga yetmaganlarga ijtimoiy-huquqiy yordam koʻrsatish markaziga joylashtirilgan.

Zarur hujjatlashtirish ishlaridan soʻng 13 nafar bola ularni kutib olish uchun kelgan ota-onalariga topshirildi. Yana 1 nafari esa markaz xodimlari hamrohligida Andijon shahriga yuborilib, onasiga topshiriladi.

• Bolalar
• O‘zbekiston
• Rossiya