Hindistonda Nipah virusi tarqalmoqda. Bu haqida The Independent xabar berdi. Ma’lum qilinishicha, yuzdan ortiq kishi karantinga olingan.

Hukumat G‘arbiy Bengaliya shtatida tarqalayotgan virusning oldini olish uchun maxsus guruh tuzdi. Hozirgacha 5 kishida virus aniqlangan, ular orasida shifokor va hamshiralar ham bor.

Bemorlar Kalkutta shahri shifoxonalarida davolanmoqda. Bir nafarining ahvoli og‘ir. Nipah virusi ko‘rshapalaklar orqali tarqaladigan patogen hisoblanadi. U hayvonlardan odamga yoki zararlangan oziq-ovqat orqali yuqadi.

Virus kasallikning og‘ir shakllarini va nafas yo‘llari infeksiyalarini keltirib chiqaradi. Simptomlarga yuqori harorat, bosh va mushak og‘rig‘i, charchoq kiradi. Shuningdek, Nipah yo‘tal, nafas qisilishi va pnevmoniya bilan birga kelishi mumkin. Virusga qarshi vaksina va davolash yo‘q. Kasallanganlarning 80 foizi vafot etishi mumkin. Bu ko‘rsatkich koronavirusga qaraganda o‘nlab marta yuqori.

Rossiyalik shifokor Andrey Osipov so‘zlariga ko‘ra, “Nipah qisman yoki to‘liq falajlik ko‘rinishidagi asoratni keltirib chiqarishi mumkin. Organizmning barcha a’zo va tizimlarida yetishmovchilik yuzaga keladi. Ko‘pincha hammasi o‘lim bilan tugaydi”.

​AQSh Kasalliklarni nazorat qilish va oldini olish markazi (CDC) ma’lumotiga ko‘ra, kasallikning inkubatsiya davri odatda 4 kundan 21 kungacha davom etadi. Biroq avvalgi epidemiyalar paytida kamdan kam hollarda kasallik alomatlari ancha kechroq paydo bo‘lgan holatlar ham qayd etilgan. Virus birinchi marta 1999-yilda Malayziyada aniqlangan bo‘lib, o‘shanda 300 ga yaqin odam kasallikni yuqtirgan, ulardan 100 dan ortig‘i esa vafot etgandi.

• Hindiston
• Virus