Poyabzal har bir inson uchun muhim. Kun davomida barcha ishlarimizni bajarish uchun, albatta, oyoqqa qulay poyabzalni kiyish shart. Biroq ba’zida vaziyat taqozosi sabab poshnali poyabzal kiyishga inson majbur bo‘ladi. Poshnali poyabzalda kun bo‘yi yurib kechga tomon oyoqlar og‘riqdan “dod” deb yuboradi. Oyoqlaringiz og‘rimasligi uchun quyidagi ayyor tavsiyalarni e’tiboringizga havola qilamiz...

• Vaznni to‘g‘ri taqsimlay oling
Poshnada yurish davomida tana vazni notekis taqsimlanadi. To‘g‘ri qadam tashlayman, deb umurtqa pog‘onasi, oyoqlarni zo‘riqtirib yuboramiz. Ayniqsa, yurish qulay bo‘lishi uchun biroz oldinga egilib ham olamiz. Aslida esa, qomatni tik tutgancha, qorin ichga tortilgancha, xuddiki butun tana bilan yuqoriga tortilmoqchi bo‘lgandek yurish kerak.

• Avval oyoq uchi, ana undan keyin tovon
Yurish vaqtida tananing bor og‘irligini avval oyoq uchiga, ana undan keyin tovonga o‘tkazish kerak. Bu bosimni kamaytiradi, oyoq suyaklarini kamroq jarohatlaydi. Oyoq kaftiga xuddiki mix kirib ketayotgandek yurmaslik uchun yurishda o‘z ritmingizni topishga harakat qiling. Bunda tana o‘zini qulay “his” qilishi kerak.

• Poyabzalning bir o‘lcham kattasidan oling
Bu qirollik oilasi va mashhur yulduzlarning siridir. Ular soatlab poshnali oyoq kiyimda yurishadi. Ular nima uchun bir o‘lcham katta poyabzal kiyishlarini bilasizmi? Oyoq kafti kechga tomon shishadi va barmoqni qisa boshlaydi. Oyoqlaringizda qadoq va yara-chaqalar paydo bo‘lmasligi uchun birato‘lasi bir o‘lcham katta poyabzal kiying. 

• Aytgancha, qadoqlar haqida...
Ularni chetlab o‘tishning ikki usuli bor. Oyoq kiyimni kiyishdan avval qadoq hosil bo‘ladiyov, degan sohalarga gelli dezodorant surtib chiqing. Agar qadoq hosil bo‘lib bo‘lgan bo‘lsa, unga qog‘oz sochiq bo‘lagini qo‘yib keyin mustahkamlash kerak. Plastir yopishtirish ham bir usul bo‘lishi mumkin. Ammo u ma’lum muddat o‘tgach, yopishtirilgan joydan surilib tushib qoladi. Yoki bo‘lmasa poyabzalingiz chetidan chiqib qoladi. 

• Oyoq suyaklarini ehtiyotlash uchun
Hech sezganmisiz, poshnali poyabzal kiyib yurgan vaqtda oyoqning 3-4 barmoqlari og‘rib qoladi. Ularni ehtiyotlash uchun sizga bor-yo‘g‘i plastir kerak bo‘ladi, xolos. Oyoqning 3-4 barmoqlari bir-biriga biriktirilgancha plastir yopishtiriladi. Nima uchun aynan bu barmoqlar deysizmi? Ushbu ikki barmoq orasidan og‘riq sezuvchi nerv tolasi joylashgan. Ularni mustahkamlab qo‘ysangiz, ularga bosim tushishi kamayadi. Shuningdek, oyoqni poyabzalga majburlab tiqish kerak emas.

• Tor poyabzalni kengaytirish usuli
Agar poyabzalingiz oyog‘ingizga torlik qilayotgan bo‘lsa, uni kengaytirish mumkin. Oyoq kiyimni qalinroq paypoq ustidan kiyib ko‘ring. Ustiga soch quritgichning issiq havo oqimini yo‘naltiring. Shunday qilinsa, poyabzal yuzasi cho‘ziladi.

• Poyabzalingiz chinnidek yarqiraydi
Usti laklangan tuflini yarqiratish uchun deraza yuvishga mo‘ljallangan vositalardan foydalanish mumkin. Uni sepib ustidan quruq sochiqda artib chiqilsa, ular xuddi oynadek yarqiraydi.

Internet ma’lumotlari asosida Nargiza Utepova tayyorladi