Do‘kondan tufli xarid qilasiz-u, u oyog‘ingizga loppa-loyiqdek ko‘rinadi. Biroq uyga olib kelib kiyishni boshlaganingizda muammolar paydo bo‘ladi. U oyog‘ingizni siqishi, sirpanishi yo bo‘lmasa, terlatib yuborishi mumkin. Bu kabi ko‘ngilsiz holatlarning oldini olish uchun nima qilish kerak? Siqilmang. Bizda bu holatlarni zudlik bilan bartaraf etadigan turli usullar mavjud. Ular yordamida oyoq kiyim bilan bog‘liq har qanday muammoga yechim topish mumkin. 

Oyoqda qadoq paydo bo‘lmasligi uchun
Oyoqdagi qadoq va suvli pufakchani davolash uchun oddiy sharikli dezodorantlar qo‘l keladi. Uni oyoq terisiga surtib, qurishini kuting. Keyin oyoq kiyim ichiga ham dezodorant purkab, kiyib yurish mumkin. 

Sirpanuvchi oyoq kiyim 

Yangi oyoq kiyimingiz hadeb sirpanib ketyaptimi? Uning ostini qumqog‘oz bilan biroz ishqalang. Faqat me’yoridan oshirib yubormang. 

Gʻichirlasa...
Tuflining g‘achir-g‘uchur ovozi joningizga tegdimi? Yangi oyoq kiyimdan voz kechishga shoshilmang. Bu kamchilikni yo‘qotsa bo‘ladi. Tufli ichiga biroz bolalar kukunidan sepasiz. Shunda g‘ichirlash qoladi. 

Oyoq kiyimlar ustining qayrilib qolishi

Agar tabiiy charmdan ishlangan oyoq kiyimi buklanib qolsa, o‘sha joyning ichki tomonini ag‘darib, bug‘ bilan biroz ishlov bering. Bu jarayondan so‘ng tufli yangidek ko‘rinadi. 

Baland poshna og‘ritsa 

Baland poshnada yuradigan xonimlar 2-3-barmoq orasidagi og‘riqlardan yaxshi xabardor. Bunga sabab, oyoq tagidagi nerv va qon aylanishining buzilishi hisoblanadi. Baland poshnalar salbiy xususiyatini kamaytirish uchun 4-5-barmoqlarni tibbiyot plastiri bilan bog‘lab qo‘ying. Bu ahvolingizni ancha yengillashtiradi. 

Etik tor kelsa 
Etik ichini biroz kengaytirish uchun unga bir necha bog‘lam gazetani yaxshilab tiqing. So‘ng uni bir necha kun qoldiring. Gazeta bog‘lamlari oyoq kiyimni ancha kengaytiradi. Zarurat tug‘ilsa, buni yana takrorlash mumkin. 

Agar vyetnamkalar barmoqlaringizni qirsa 

Vyetnamka eng qulay oyoq kiyimi hisoblanadi. Biroq u ham sizga noqulaylik tug‘dirishi mumkin. Agar rezina bog‘lari barmog‘ingizga botsa, ularni atlas yoki ipak mato bilan o‘rab chiqing. 

Noxush hid
Oyoq kiyimi o‘zidan noxush hid taratyaptimi? Kechqurun ichiga bir nechta quruq paketli choyni tashlab qo‘ying. Ertalab noxush hiddan asar ham qolmaydi. 

Suv dog‘lari  
Suv tomgach, ko‘pincha oyoq kiyimida dog‘ qoladi. Undan xalos bo‘lish yo‘li juda oson. Tish pastasiga biroz sirka aralashtirib, tuflini arting va toza suvda yuvib tashlang. 

Rezinadan qilingan oyoq kiyim 

Bolangizni turli yiqilishlardan himoya qilmoqchi bo‘lsangiz, rezina tapochka tagiga bir necha qator issiq kley yurg‘izib chiqing. 

Yaltirashi uchun! 

Laklangan oyoq kiyimi avvalgidek yaltirab turishini istasangiz, ustiga oyna yuvish vositasidan sepib, mayin mato bilan arting. 

Agar oyoq kiyimi siqsa
Yangi oyoq kiyimi sizga mos tushishi uchun bir necha kun kerak bo‘ladi. Bunga chidab o‘tirish kerak emas. Oyoq kiyimga qalin jun paypoq kiydirib, ustidan fen bilan qizdiring. Aynan siqayotgan joylariga ko‘proq e’tibor qarating. 

Oyoqlar terlasa

Gipergidroz – ko‘pchilikka tanish hodisa. Oyoqni doim xushbo‘y saqlash uchun tovon qismiga kundalik gigiyenik prokladkadan qo‘ying. Ularni tez-tez almashtirib tursangiz, oyoq kiyimingizdan doim yaxshi hid taralib turadi. 

Qirilgan joylar 

Oyoq kiyim yuzasidagi qirilgan joylarni tibbiyot yoki texnik vazelin yordamida tekislash mumkin. Paxtali cho‘p yordamida qirilgan yuzaga vazelinni surtib, mayin harakatlar bilan uni yoyib chiqamiz.