XIX asrda yashagan taniqli nemis faylasufi Artur Shopengauer odamlarni uncha xushlamas, butun umrini bo‘ydoqlikda o‘tkazgan erkinlik tarafdori edi. U nemis romantizmini yoqtirar, g‘aroyibotlar bilan qiziqar, “falsafa ikki ming yil mobaynida yaratishi mumkin bo‘lgan eng muhim voqelik”, deya Immanuil Kant ishlariga yuqori baho berar, buddaviylikning falsafiy g‘oyalarini ardoqlardi. 

Artur Shopengauer mavjud dunyoni “olamlar ichida eng yaramasi”, deya nomlagani tufayli “tushkunlik faylasufi”, degan laqab orttirib olgandi. Biroq bu narsa unga inson tabiati, istak va maqsadlarini har tomonlama o‘rganishga xalaqit bermadi. Uning yozish uslubini “hikmatomuz” deb atashgandi: Shopengauerning ko‘plab iqtiboslari  yodlab olishga ham arziydi.

• O‘zingizga o‘zingiz: “Buni o‘zgartira olmayman, demak, endi buning foydali tomonini axtarish qoldi”, deb tez-tez gapirib turish mantiqdan xoli bo‘lmasdi. 
  
• Sen o‘zingni o‘rab turgan be'manilikka qarshi hech narsa qila olmaysan! Lekin behuda tashvishlanma, axir botqoqqa otilgan tosh aylana hosil qilmaydi. 
  
• Boylik xuddi sho‘r suvga o‘xshaydi: undan qanchalik ho‘plaganingiz sari shunchalik tashnaligingiz ortib boraveradi.
  
• Odamlar boylik orttirish to‘g‘risida aql va yuraklari tarbiyasiga e'tibor berishdan ko‘ra ming karra ko‘proq tashvishlanishadi. Vaholanki, baxt va toleimiz uchun insonda aslida mavjud bo‘lgani, shubhasiz, u orttirganidan ko‘ra muhimroqdir.  
  
• O‘rtamiyona odam vaqtini qanday o‘ldirish bilan ovora, iste'dod esa vaqtdan qanday foydalanish ustida bosh qotiradi.
  
• Kim yolg‘izlikni sevmasa, demak, u erkinlikni ham yoqtirmaydi.
  
• Ba'zan qaysidir olis maskanni qo‘msayotgandek tuyulamiz. Aslida esa biz o‘sha yerda hozirgidan ko‘ra yoshroq va bardamroq bo‘lgan paytlarda o‘tkazgan lahzalarimizni qo‘msayotgan bo‘lamiz. Vaqt bizni joy niqobi ostida shunday aldaydi...
  
• Har bir bola qaysidir ma'noda daho va har bir daho qaysidir  ma'noda boladir.
  
• Dushmaning bilishi lozim bo‘lmagan gapni do‘stingga ham aytma.
  
• Insoniyat taraqqiyotidagi jiddiy to‘siqlardan biri sifatida shuni hisoblash  lozimki, odamlar boshqalardan aqlliroq bo‘lganni emas, hammadan ko‘ra qattiqroq gapirganni eshitishadi.
  
• Har bir kishini tinglash mumkin, ammo hamma bilan ham gaplashish shart emas.