Hozirda ko‘p onalar o‘zlariga qulay bo‘lishi uchun chaqaloqlarini yonida olib uxlashadi. Bu yaxshidir. Biroq bolani alohida xonada uxlaydigan vaqti kelganda ajratish juda qiyin kechishi mumkin. 

Ruhshunoslar bola 3 yoshga to‘lganda alohida uxlashi shart deb hisoblashadi. Aynan mana shu yoshda u o‘zi va onasi yagona borliq emasligini tushunib yetadi. O‘z chegaralarini belgilab olishni boshlaydi. 

Ko‘pgina bolajonlar o‘zining alohida xonasi bo‘lishini va uni tasarruf eta olishni xush ko‘rishadi. Biroq “ko‘chish”ning dastlabki kunlarida bu biroz og‘irroq kechadi.  
“Ko‘chib o‘tuvchilar”ning ota-onalari uchun layfxaklar

1.  Bola onasiz uxlashga qo‘rqishi mumkin. Karavoti yonidagi stulda onasining biror kiyimi turgani ma’qul. Onasining hidi bolani tinchlantiradi.
2.  Bolani uyquga tayyorlang: ertak aytib bering. Allalang. Uxlagandan keyin chiqib ketsangiz yana-da yaxshi. 
3.  Bola qorong‘ilikda yolg‘iz o‘zi uxlashga qo‘rqadi. Tunchiroqni yoqib qo‘ygan ma’qul.

Bolalar ota-onasining oldiga birgalikda uxlash uchun qaytib kela boshlaydi. Bunday holatda qanday yo‘l tutiladi?  

Ruhshunos maslahati:
Agar bola oldingizga birinchi marta qaytib kirsa, uni erkalatib, suyub, shirin so‘z ayting va o‘zining karavotiga olib chiqib yotqizing-da, xonasidan chiqib keting.  
Ikkinchi marta: erkalating, o‘pib qo‘ying, biroq gaplashmang. Indamasdan xonasiga olib borib yotqizing va ortingizga qayting.
Uchinchi marta: erkalatmang, o‘pmang, gaplashmang ham. Shunchaki qo‘llaridan ushlab, joyiga yotqizib, o‘z xonangizga qayting.
Bu holat butun tun davomida 10 martagacha takrorlanishi mumkin. Asabiylashmang, bolaga charchab ketganingizni bildirmang. Sabr qiling va boshlagan ishingizni nihoyasiga yetkazing. Bolaning alohida uxlashga o‘rganishi o‘zingizga bog‘liq. 

Bola ota-onasi qat’iy qaror qabul qilganini tushunganidan keyin alohida uxlashga ko‘nikadi. Biroq shunday holatlar bo‘ladiki, alohida uxlaydigan bola kechasi bosinqirab qo‘rqishi, o‘zini yomon his qilishi mumkin. Bu holatlarda bolani o‘z o‘rnida yotishga majbur qilish yaramaydi. Yoningizga oling. Ertalab esa kechasi nima bo‘lganini aniqlab olish mumkin.

Agar bola 4,5 va undan ham kattaroq yoshda ota-onasidan alohida xonada uxlashni istamasa, buning sababini aniqlab olish va muammoni bartaraf qilish kerak. Uyqudan oldin bolaning planshet, telefon, kompyuter o‘ynashiga yo‘l qo‘ymang. Kechki o‘yinlar juda sokin bo‘lishi zarur. Sayr ham juda foydali.