2021–2023-yillarda bolalar, tug‘ish yoshidagi, homilador va bola emizuvchi ayollarni profilaktik maxsus preparatlar bilan bepul ta’minlash chora-tadbirlari dasturi tasdiqlandi. 

Bu borada Prezidentning “Aholiga ko‘rsatilayotgan tibbiy yordam sifatini yanada yaxshilash chora-tadbirlari to‘g‘risida”gi qarori imzolandi.

Qaror bilan tasdiqlangan Dasturga binoan: 
–  6-23 oylik bolalarni  uy sharoitida tayyorlangan ovqatlarni boyitish maqsadida mikronutriyent kukuni bilan;  
–  2-10 yoshdagi bolalarni  gelmintoz profilaktikasi bo‘yicha maxsus preparatlar bilan;  
–  6 oylikdan 5 yoshgacha bo‘lgan bolalarni – “A” vitamin bilan;  
–  homilador va bola emizuvchi ayollar, 3-15 yoshdagi bolalarni  yod preparati bilan; 
–  35 yoshgacha tug‘ish yoshidagi ayollarni polivitamin temir va foliy kislotasi preparati bilan bepul ta’minlash ko‘zda tutilmoqda. 

Qayd etilishicha, ushbu dasturni amalga oshirish uchun 2021–2023-yillarda Davlat byudjetidan 264,5 milliard so‘m mablag‘ ajratiladi.