Ba’zida tasodifiy xatti-harakatlarimiz sabab top-toza kiyimga dog‘ tushirib qo‘yamiz. Kichik dog‘ bo‘lsa mayli, ammo kattasi bo‘lsa-chi? Yana bu dog‘ soch bo‘yog‘i, sharob yoki shokoladdan qolgan bo‘lsa-chi? Endi kiyimni tashlab yuborish kerakmi? Albatta, yo‘q. Eng to‘g‘ri yo‘l, dog‘ni ketkazishdir. 
Quyida dog‘larni ketkazishning 14 turdagi usulini bilib olamiz.

1. Yashil o‘t rangini ketkazish

Farzandlarning ko‘chada, o‘t-o‘lan ustida ko‘p o‘ynashi sabab ba’zida kiyimda yashil dog‘ paydo bo‘ladi. Bu dog‘ni odekolon, novshadil spirti yordamida yo‘qotish mumkin. 30 ml. odekolonga 10 ml. novshadil spirti qo‘shiladi va kiyimning muammoli sohasi artiladi.

2. Ter dog‘ini yo‘qotamiz

Paxtali kiyimlarda bunday dog‘larni sharob sirkasi (1 osh qoshiq sirka bir stakan suvga solinadi) bilan, ipak kiyimlardagi dog‘ni toza spirt (1 osh qoshig‘i bir stakan suvga solinadi) yordamida yo‘qotiladi.

3. Soch bo‘yog‘idan qolgan dog‘ qanday ketkaziladi?

Uch foizli vodorod perekis bir xil miqdorda novshadil spirti bilan aralashtiriladi va dog‘ tekkan joy artiladi.

4. Kiyimga guash tekkan bo‘lsa...

Dog‘ tekkan kiyim kir yuvish kukuni solingan suvda yarim soatga bo‘ktirib qo‘yiladi. Keyin quritiladi. Qurigach, dog‘ cho‘tka yordamida ishqalanadi.

5. Qon dog‘ini yo‘qotamiz

Ayrimlar qon tekkan kiyimni issiq suvga solib, uni yuvishga urinadi. Ammo qon dog‘ini ketkazish uchun sovuq suvdan ham foydalansa bo‘ladi. Kiyimning dog‘ qismi xo‘jalik sovuni yordamida ishqalanadi.

6. Yod kiyimga tekkan bo‘lsa-chi?

Yod dog‘ini novshadil spirti shimdirilgan shimgich (sponj)da artib, yo‘qotish mumkin.

7. Yelimdan qolgan dog‘

Yelimni yo‘qotishda tirnoq bo‘yog‘ini ketkazuvchi suyuqlikdan foydalanish mumkin. Ammo bunda tarkibida atseton bo‘lganlarini qo‘llash tavsiya etilmaydi. 

8. Saqichdan qolgan dog‘lar uchun

Kiyimga tekkan saqichni artib, ketkazishga urinish noto‘g‘ri. Uni muzlatkichga solib qo‘yish orqali saqichni osongina olib tashlash mumkin.

9. Shokoladdan ham kiyimda dog‘ qoladi

Bu turdagi dog‘larni yo‘qotishda tuzli suv yordam beradi. 1 litr suvga qo‘shilgan 1 osh qoshiq kungaboqar yog‘i muammoning eng zo‘r yechimi.

10. Kiyimdagi yog‘ dog‘ini qanday yo‘qotamiz?

Kiyimda qolgan yog‘ dog‘i tish yuvish poroshogi yordamida ketkaziladi. Dog‘ga poroshok surtilgach, oradan 2-3 soat o‘tgach, cho‘tka yordamida tozalab tashlanadi.

11. Kiyimga sharob to‘kilib ketsa...

Qizil sharob rangini issiq suv kuchi bilan yo‘qotish mumkin. Kiyim tog‘orachaga solinadi va ustidan qaynagan suv quyiladi. 

12. Sut yoki sho’rvadan qolgan dog‘lar uchun...

Bunday dog‘lar bilan kurashish uchun sizga novshadil spirti, sirka kislotasi yoki spirt, tuz kerak bo‘ladi. Ulardan bir xil nisbatda qo‘shilib, aralashma tayyorlanadi (tuz biroz kamroq solinadi). Keyin suvda chayib tashlanadi. Qurigach, dazmol qilinadi. 

13. Sharbat dog‘ini yo‘qotamiz

1 choy qoshiq vodorod perekis yarim stakan suv bilan aralashtiriladi. Ushbu aralashmada namlangan sochiq bilan dog‘ bo‘lgan yer artiladi. So‘ngra sovuq suvda chayib tashlanadi.

14. Kiyimdagi lab bo‘yog‘ini ham yo‘qotish mumkin

Lab bo‘yog‘idan qolgan dog‘ ustiga natriy tetraborat moddasidan sepiladi. Bu moddani dorixonadan topish mumkin. So‘ng cho‘tka bilan artiladi va sovunli suvda yuviladi. Sovuq suvda chayqab tashlanadi.