Davlat xavfsizlik xizmati xodimlari tomonidan Ichki ishlar va Bojxona idoralari bilan hamkorlikda o‘tkazilgan tezkor-qidiruv tadbirlari davomida qo‘shni davlatdan kontrabanda yo‘li bilan olib kelingan katta miqdordagi narkotik modda to‘xtatib qolindi.

Ma’lum bo‘lishicha, oldindan kuzatuvga olingan, Marg‘ilon shahrida yashovchi, 1973-yilda tug‘ilgan, muqaddam narkojinoyat sodir etganligi uchun sudlangan shaxs o‘zining qirg‘izistonlik tanishlari tomonidan Xo‘jaobod tumanidagi xufiya joyga yashirib ketilgan 24 kg 475 gr “gashish” moddasini qabul qilib olgan vaqtida ashyoviy dalillar bilan qo‘lga olingan.

Mazkur holat yuzasidan unga nisbatan Jinoyat kodeksining 28, 246-moddasi (kontrabanda) 2-qismi hamda 25, 273-moddasi (giyohvandlik vositalari, ularning analoglari yoki psixotrop moddalarni o‘tkazish) 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llanilgan.

Hozirda tergov harakatlari doirasida uning jinoiy sheriklarining shaxsiga aniqlik kiritilmoqda.

• Andijon
• Bojxona
• DXX
• Giyohvandlik
• Ichki ishlar
• Marg'ilon