JSST rahbari Tedros Gebreyesus Birinchi xonim Ziroat Mirziyoyevani «bolalar saratoniga qarshi kurash va ularning hayotini yaxshilashdagi chinakam yetakchi» deya e’tirof etdi

Ziroat Mirziyoyeva hamda Tedros Adhanom Ghebreyesus Respublika ixtisoslashtirilgan bolalar onkologiyasi, gematologiyasi va immunologiyasi ilmiy-amaliy tibbiyot markaziga tashrif buyurdi.

Tashrif davomida Jahon sog‘liqni saqlash tashkiloti ko‘magida bolalar onkologiyasi xizmatini rivojlantirish bo‘yicha amalga oshirilayotgan ishlar taqdim etildi. Jumladan, bemorlarni yo‘naltirishning raqamli tizimi, hududiy infratuzilmani mustahkamlash, kadrlar tayyorlash hamda ilmiy tadqiqot va innovatsiyalarni rivojlantirish yo‘nalishlari haqida ma’lumot berildi.

Markaz qoshidagi “Mehrli maktab” gospital maktabi faoliyati bilan tanishildi. Unda uzoq muddat davolanayotgan bolalarni ijtimoiy-psixologik qo‘llab-quvvatlash va ta’lim bilan qamrab olish ishlari yo‘lga qo‘yilgan.