Ovqat tayyorlashni bilmayman, degan insonning qo‘lidan ham hech bo‘lmaganda kartoshka qovurish kelsa kerak. Nafaqat bolajonlarning, balki kattalarning ham jonu dili bo‘lgan bu mahsulot deyarli barcha taomlarda turlicha ko‘rinish beradi. Xo‘sh, qovurilgan qarsildoq kartoshkalar-chi? Ularning ko‘rinishi hamda mazasi siz kutgandek chiqyaptimi? Agar javobingiz “yo‘q”  bo‘lsa,  unda quyidagi besh qoida aynan siz uchun. 

Aytgancha, ishni qancha kartoshka iste’mol qilishni inobatga olgan holda boshlaganingiz ma’qul. Oilangiz uchun “zaxira”ni biroz keyinroq tayyorlasangiz ham bo‘ladi. 

Birinchi qoida – qovurish uchun ajratilgan kartoshkalar tozalanadi. Tovaga ularni bo‘lib-bo‘lib soling. Tovada qancha kam kartoshka bo‘lsa, shuncha mazali bo‘ladi. Miqdorni to‘g‘ri olishning eng yaxshi yo‘li – kartoshka qovurilayotganda tovaning tag qismi ko‘rinib turishi kerak. 

Ikkinchi qoida – kartoshkaning kraxmali ko‘p miqdorda bo‘lsa, u yaxshilab yuviladi. Shundagina qovurilish jarayonida ular yopishib qolmaydi. Kartoshka yuvilgandan so‘ng biroz quritiladi. Agar uni quritmay tovaga soladigan bo‘lsangiz yog‘ sachrashi mumkin. Hamda yog‘da suvning hisobiga sovish kuzatiladi. 

Uchinchi qoida – moy yoki o‘simlik yog‘i kartoshka qovurilishidan oldin yaxshilab qizitilishi kerak. Qattiq qizitilgan yog‘ga kartoshkalar solinadi va bir necha daqiqa davomida aralashtirilmaydi. Birozdan so‘ng, kartoshkaning ustki qismi qizil tusga kira boshlaydi. Bu 3-4 daqiqada bo‘lishi mumkin. Darhol kartoshkani aralashtirishga kirishmang, bundan yog‘ning harorati tushadi. Sovigan yog‘da esa kartoshka qovurilmaydi, aksincha dimlanadi. 

Ishtahani ochuvchi qizg‘ish tus kartoshkani aralashtirish kerakligidan darak beradi. Oradan bir necha daqiqa o‘tgach, kuchli olovni o‘rtacha darajaga tushirishingiz mumkin. Birozdan so‘ng kartoshkalarning pishganligini tekshirib ko‘rish kerak. 

To‘rtinchi qoida – tova ustini hech qanday qopqoq bilan yopa ko‘rmang. Qopqoq qovurilgan kartoshkani dimlanishiga olib keladi.

Beshinchi qoida – tuzni kartoshkalar pishganidan so‘ng yoki suzayotganda solgan afzal. Sababi tuz namlikni tortib oladi va kartoshka yuzasida paydo bo‘lgan qizil qobiq qattiqligini yo‘qotadi. Natijada kartoshka qovurilgan emas, dimlangan kartoshkaga aylanib qoladi. 

Marhamat, tayyor bo‘lgan kartoshkani ko‘katlar bilan tanovul qilishingiz mumkin. Yoqimli ishtaha!