AQShda Nyu York federal sudi marhum moliyachi va jinsiy jinoyatlarda ayblangan Jeffri Epshteyn tomonidan yozilgani aytilayotgan o‘lim oldi maktubini e’lon qildi. Hujjatda: “Xayrlashish vaqtini o‘zi tanlay olish yoqimli”, degan jumlalar keltirilgan.

Ma’lum qilinishicha, qo‘lda yozilgan maktub Epshteynning sobiq kameradoshi — qotillikda ayblangan sobiq politsiyachi Nikolas Tartalyone tomonidan topilgan. Sudya Kennet Karas hujjatni ommaga ochiq sud materiali sifatida e’lon qilishga qaror qilgan.

Sud qarorida maktubni yashirish uchun yetarli huquqiy asos mavjud emasligi qayd etildi. Shu bilan birga, sud maktubning haqiqiyligi bo‘yicha yakuniy xulosa bermagan.

Maktubda Epshteyn tergovlar davomida unga qarshi dalillar topilmaganini yozib, keskin va hissiy fikrlar bildirgan. Ushbu hujjat uning 2019-yildagi sirli o‘limi bilan bog‘liq muhokamalarni yana kuchaytirdi.

Shuningdek, jurnalistlar Epshteynning shaxsiy orolidagi noodatiy “masjid” loyihasi haqida ham yangi ma’lumotlarni oshkor qilgan. Aytilishicha, bino uchun Ka’baning kisvasi, O‘zbekistondan olib kelingan koshinlar hamda Suriya me’morchiligi uslublaridan foydalanilgan.