Platforma xavfli mahsulotlar savdosini yetarlicha nazorat qilmagani uchun 200 mln yevro miqdorida jarimaga tortildi.

Yevropa Ittifoqi Xitoyning onlayn-marketpleysi Temu ni 200 million yevro miqdorida jarimaga tortdi. Yevropa Komissiyasi ma’lumotiga ko‘ra, platforma orqali xavfli bolalar o‘yinchoqlari, xavfsizlik talablariga javob bermaydigan zaryadlovchi qurilmalar va boshqa noqonuniy mahsulotlar sotilgan.

Tekshiruv natijalariga ko‘ra, kompaniya sotuvga qo‘yilgan tovarlar bilan bog‘liq xavflarni aniqlash va baholash bo‘yicha samarali tizim yarata olmagan. Shuningdek, iste’molchilar xavfsizligiga tahdid soluvchi mahsulotlarning tarqalishiga qarshi yetarli choralar ko‘rilmagani qayd etilgan.

Tergov deyarli ikki yil davom etgan.

Temu faoliyati bo‘yicha rasmiy tekshiruv 2024-yil oktabrida boshlangan. Oradan bir necha oy o‘tib, Yevropa regulyatorlari kompaniya iste’molchilar huquqlarini himoya qilish va tovarlar xavfsizligi bo‘yicha talablarni buzgan bo‘lishi mumkinligini bildirgan.

Hozirda Temu qarorga qarshi chiqib, jarimani nomutanosib deb baholagan va huquqiy choralar ko‘rishini ma’lum qilgan.