Rossiya tashqi ishlar vaziri Sergey Lavrov matbuot anjumani vaqtida unga xalaqit bergan jurnalistga tanbeh berdi.

Lavrov gapirishni boshlagan paytda jurnalist telefonidagi tarjima ovozini baland qilib yuborgan. Vazir bir necha soniyaga jim qolib, ingliz tilida: “Xonani tark eta olasizmi? Kim shovqin chiqaryapti: sizmi yoki telefoningizmi?”, – deb so‘ragan.

Biroq bu yordam bermadi. Telefon ovozi yana zalni to‘ldirdi. Shundan so‘ng Lavrov jurnalistga yana murojaat qilib: “Tashqariga chiqa olasizmi? Men hazillashmayapman”, – dedi. Keyin esa qo‘riqchilariga qarab: “Yigitlar, uni bu yerdan olib chiqinglar. Agar telefoningizni bermasangiz, ular qurolini chiqaradi”, – degan Lavrov.

Keyinroq Rossiya TIV rasmiysi Mariya Zaxarova hech kim zaldan chiqarilmaganini ma’lum qildi. Uning aytishicha, operatorga telefon ovozini pasaytirish bo‘yicha ikki marta iltimos qilingan va undan qurilmani matbuot anjumani tugaguncha bir chetga qo‘yish so‘ralgan. Shundan so‘ng tadbir odatdagidek davom etgan.

Lavrov ayni paytda uch kunlik tashrif bilan Nyu-Dehlida bo‘lib turibdi. U BRICS tadbirlarida qatnashib, Hindiston, Tailand, Misr, Eron va Malayziya vakillari bilan muzokaralar o‘tkazgan.

• Hindiston
• Rossiya
• Sergey Lavrov
• jurnalist
• sammit