Pul hayotda ko‘p narsani hal etadi, degan aqiyda mutlaqo noto‘g‘ri. Buni boy insonlar taqdirida ham ko‘rishimiz mumkin. Ular millionlab dollar ishlab topishadi, biroq ma'lum bir sabablarga ko‘ra keragidan ortiq pullaridan mosuvo bo‘lishadi. Axir odamlar orasida “pul qo‘lning kiri”, degan ibora bekorga tarqalmaganku.

Ammo kamchilik insonlar bunday paytlari o‘zini yo‘qotib qo‘ymaydi. Ular matonat bilan barchasini yana qaytadan boshlashga tayyor bo‘lishadi. Biz sizga hikoya qilmoqchi bo‘lgan insonlarni butun dunyo taniydi. Ular birgina filmga tushishlari yoki konsert uyushtirishlari, shou tashkil etishlari bilan millionlar ishlab topishadi. Biroq hayot bir tekis davom etmaydi. Xuddi shunday ularning hayotida ham ko‘plab yo‘qotishlar bo‘ladi. Gap pullar haqida ketayapti...

Kim Beysinger. Avvaliga modlerlik qilgan, so‘ng o‘z omadini filmlarda sinab ko‘rgan dunyoga mashhur aktrisa, ilk bor moddiy muammoga 5,4 mln. dollar miqdordagi summa bilan uchragan. “Main Line Pictures” kinokompaniyasi o‘zi suratga olayotgan filmlardan birining bosh rolini Kimga beradi. Ammo u shartnomada ko‘rsatilingan shartlarni to‘liq bajarmaydi. Shundan so‘ng kinokompaniya uni sudga berishga majbur bo‘ladi. Ular aktrisadan 8,1 million dollar miqdorida pul undirib olishadi. 

Ana shu ishlardan so‘ng, Kim o‘ta ehtiyotkor bo‘lib qoladi. U mablag‘larini to‘g‘ri boshqarishni o‘rganib oladi. Shu bois hozirda uning hisobida 35 mln. dollar mablag‘ bor.

Dennis Rodman. Alimentlar ko‘pchilik ajrashgan erkaklar uchun dahshatning o‘zginasi. Agar ular biror-bir mashhur shaxs tomonidan to‘lanmasa, ana mash-masha-yu, manam mash-masha. Reklama roligi shartnomasi ortidan 27 mln. dollar pul ishlab topgan Dennis Rodman aynan shu masala yuzasidan sudga tushib qoldi va 51 minglik qo‘shimchasi bilan 809 ming dollar jarima to‘ladi.

“MC Hammer”. Qo‘log‘ingizga “MC Hammer” tomonidan beg‘ubor ijro etilgan “u can't touch this” qo‘shig‘i eshitilsa, shuni bilingki uning hayoti qo‘shig‘i singari beg‘ubor kechgan emas. U mashhurlik cho‘qqisida ekanligida pullarini havoga sovura boshladi, oxirini o‘ylamay katta-katta moddiy qarorlar qabul qildi. Shu bois u bugunga kelib, to‘planib qolgan 800 ming dollarlik qarzini to‘lamoqda. Ammo u bundan aslo tushkunlikka tushgani yo‘q, aksincha iqtisodiy faol hayot kechirmoqda.

Frensis Ford Koppola. O‘ziga ajratilgan mablag‘dan 7 baravar kam mablag‘ yiqqan “Chin yurakdan” myuzikli tufayli, rejissyor 98 mln. dollarlik qarz bilan o‘zini bankrot, deb e'lon qilishga majbur bo‘ldi. Kopollaning qancha puli borligi ma'lum emas, ammo shaxsiy vinozavodi, bir necha butik oteleysi va albatta, kino orqali uning ishlari yurishib turibdi.

Larri King. Amerikaning eng mashhur teleboshlovchilaridan biri o‘zining tok-shousiga erishishdan oldin uning 350 ming dollar miqdorida qarzi bor edi. O‘z sherigi tomonidan ish bo‘yicha o‘g‘rilikda ayblangan jurnalist uchun bu raqamlar katta pulni anglatardi. U bir necha yil davomida ish qidirib yurdi. Ammo hech kim uni ishga qabul qilmadi. 1978 yilda deyarli bankrotlikka uchrab bo‘lgan Larri CNN telekanaliga ishga joylashadi. Ana shundan so‘ng ko‘p o‘tmay moliyaviy oyoqqa turib oladi.

Nikolas Keyj. Ko‘p pul sovuradigan yulduzlar uchun soliqlar, xuddi alementlar singari katta muammo sanaladi. Masalan, mashhur kino yulduzi Nikolas Keyj soliqdan 6,5 million dollarlik qarzini to‘lay olmaganligi uchun bir necha ko‘chmas mulkini, jumladan, uylarini sotishga majbur bo‘ldi. Ayni o‘sha paytlarda u bir qator kinoloyihalarda ham ishtirok etayotgandi. Shu bois nafaqat soliqdan balki o‘z sohasida mas'uliyat tomonidan ham qarzdor edi. Uning amakisi Frenses Ford Koppola o‘z jiyani bilan faxrlanadi, qarzdorligining sababini esa uning o‘ta aqlsizligida, deb biladi.

Mayk Tayson. 20 yillik karerasi davomida ishlab topgan 400 mln. dollarlik mablag‘i, 2003 yilda boshiga tushgan 23 mln. dollarlik qarzini qoplashga yordam bera olmadi. Uning ajrashuv jarayoni ham oz emas ko‘p emas, 9 mln. dollar mablag‘ ketdi. Ammo u bularning barini o‘ziga yarasha temir iroda bilan yenga oldi.

Maykl Jyekson. Yuqoridagi misollar shuni ko‘rsatdiki, mashhurlarning aksariyati ruhan kuchli insonlar bo‘larkan. Ular vaqti kelib, moddiy qiyinchilikka uchrab qolishadi, ammo hech qachon buni birovga bildirishmaydi. O‘z yo‘llarida davom etaverishadi. Xuddi shu holat, nazarimizda, 2009 yilda bir necha million qarzi bilan yorug‘ dunyoni tark etgan pop-musiqa qiroli Maykl Jyekson bilan ham sodir bo‘lishi kerakdek tuyuladi. Chunki u o‘limidan oldingi oxirgi oylarni o‘zining mavqeni saqlab qolish va qarzlarini uzish uchun tashkillashtirilgan dasturlarga tayyorgarlik bilan o‘tkazdi.

Haqiqatni olib qaraydigan bo‘lsak, pul inson mavqeni belgilab bermaydi. Irodasi mustahkam, o‘zini hurmat qila biladigan har qanday shaxs pul bilan bog‘liq muammolarni yengga oladi. U xoh mashhur bo‘lsin, xoh oddiy inson.