Bugun poytaxtimizdagi “Hilton” mehmonxonasida Jahon futboli afsonalari bilan uchrashuv tashkil etildi. Tadbirda jurnalistlar o‘zlarini qiziqtirgan bir qator savollarga javob olishdi.

Savol: Zamonaviy futbolda himoya chizig‘i qanchalik kuchaygan. Siz o‘ynagan va jahon chempioni bo‘lgan davrdagi Italiya terma jamoasi kuchlimi yoki ayni paytda faoliyat yuritayotganimi?

Fabio Kannavaro: “Mening fikrimcha 2006-yilda jahon chempioni bo‘lgan terma jamoamiz kuchliroq edi. Boisi hamma chiziqda eng mahoratli, betakror o‘yinchilar jamlanishgandi. Bejizga chempion bo‘lmaganmiz.

Zamonaviy futbolda himoya qanchalik kuchaygan degan savol ancha keng qamrovli. Hozirgi futbolda himoyachi faqat to‘pni olib yurgan raqibga qarshi o‘ynamasdan, butun maydonni va unda bo‘ladigan voqealar rivojini oldinda ko‘ra bilishi kerak. Boshqacha aytganda butun maydonni nazorat etib turishi lozim. Ayni paytda himoyachining vakolat doirasi kengaygan”

Savol: O‘zbekiston terma jamoasining sobiq sardori Odil Ahmedov bilan “Anji”da birga o‘ynagansiz. O‘sha davrlardan qanday umumiy xotiralar qolgan?

Roberto Karlos: “Iliq xotiralarni yodga tushirgan savolingiz uchun katta rahmat. Odil Ahmedov jamoamizga kelgan paytdayoq uning salohiyatiga amin bo‘lganman. Maydonni ko‘ra bilishi, o‘yinni o‘qishi, tashkil etish qobiliyati va aniq to‘p uzatishlari bilan yuqori darajadagi futbolchi ekanligini isbotlagan. Odil bilan birga to‘p tepish men uchun sharaf bo‘lgan. Odil bilan yaxshi do‘st, o‘rtoq bo‘lib qolganmiz. Kecha futzal uchrashuvini birgalikda o‘tirib, tomosha qildik. U bilan yana diydorlashganimdan xursandman.

Superkubokka taklif bois O‘zbekistonga keldim. Mamlakatingiz futbolining juda tez, jadal o‘sayotganini o‘z ko‘zim bilan ko‘rdim. Barchangizni Jahon chempionati yo‘llanmasi bilan tabriklayman. Bizni Toshkentga, ajoyib tadbirga taklif etganliklari uchun O‘FF rahbariyatiga minnatdorligimni bildiraman.

Savol: “Xabi Alonso boshchiligida “Real” qanchalik yuksak natijalarni qayd eta oladi?

Roberto Karlos: - Men “Real”ning faxriy elchisiman. Ko‘p ma’lumot bera olmayman. “Real” katta klub. Hamisha yuksak marralarni ko‘zlab, ulkan maqsad sari harakat qiladi. Bu jamoaga har bir mutaxassis har tomonlama tayyor bo‘lib keladi. Xabi Alonsoda ham katta ishtiyoq bor. Biz uni qo‘llab quvvatlaymiz. Unga ishonamiz.

Savol: “O‘zbekistonga tashrifingizdan mamnunmisiz? Bizning mamlakat haqidagi taassurotlaringiz? O‘zbekistondan keyin yana qaysi mamlakatlarga bormoqchisiz?”

Klod Makelele: “UEFA tarkibida 10 yildan ziyod faoliyat yuritib kelyapman. O‘zbekistonga meni taklif etishgani uchun tashkilotchilarga katta rahmat. Bunday tadbirlar yosh avlodning barkamol voyaga yetishi, sog‘lom avlod tarbiyasi uchun juda muhim. Bizni juda iliq kutib olishgani uchun minnatdorman. Futbol targ‘ibotiga qo‘shayotganlarga hissasi uchun katta rahmat”

Savol: “O‘zbekistonga tashrifingizdan mamnunmisiz. Bizning mamlakat haqidagi taassurotlaringiz?”

Frank Riberi: “O‘zbekistonga tashrifimdan oldin menga Kevin aloqaga chiqdi. Taassurotlarim juda katta. Juda saviyali o‘yinning guvohi bo‘ldim. O‘zbekiston juda tez rivojlanib borayotgan mamlakat ekanligini ko‘rdik, amin bo‘ldik. Jahon chempionatiga yo‘llanma olganliklaringiz bilan tabriklayman. O‘zbekiston yoshlarida katta ishtiyoqni ko‘ryapman. Sizlarning imkoniyatlaringiz katta, bunga shubha yo‘q”

Savol: “Oltin to‘p” egasini aniqlash tamoyillari haqida fikringiz? Bu yilgi mavsumda kim unga ko‘proq loyiq deb o‘ylaysiz?”

Frank Riberi: “Bu ancha murakkab savol bo‘ldi. “Oltin to‘p”ni qo‘lga kiritilgan mukofotlar, erishilgan yutuqlardan tashqari, sifatli o‘yin ko‘rsatganligini ham inobatga olib berishsa yomon bo‘lmasdi. Bu yilgi mavsumda “Oltin to‘p”ni olishga Usmon Dembele ko‘proq haqli deb o‘ylayman”

• Futbol
• Intervyu
• Sport
• Yulduz