O‘zbekistondagi Islom sivilizatsiyasi markazining jahon ilm-fani rivojiga ulkan hissa qo‘shgan allomalarimiz merosini keng jamoatchilikka yetkazishning navbatdagi “siri” ochildi. 

Markaz ekspozitsiyalarida nafaqat diniy yozma yodgorliklar, balki ilm-fan taraqqiyotini belgilab bergan buyuk asarlar ham keng o‘rin olmoqda.

Shular jumlasidan, hozirda Oksford universiteti Bodlean kutubxonasida saqlanayotgan Muhammad al-Xorazmiyning mashhur asari – “Al-jabr val-muqobala hisobi haqida qisqacha kitob” nusxasi ilk bor O‘zbekistonda jamoatchilikka namoyish etilishi kutilyapti.

IX asrda yozilgan ushbu risola zamonaviy algebra fanining asosiy manbai sifatida e’tirof etiladi. Aynan ushbu asar orqali “al-jabr” atamasi ilm-fanga kirib kelgan va bugungi kungacha o‘z ahamiyatini yo‘qotmagan.

Kitobda arifmetik va geometrik hisoblar, kvadrat va ildiz tushunchalari, meros taqsimoti, savdo bitimlari va huquqiy masalalarda qo‘llangan amaliy misollar bayon etilgan. 

Al-Xorazmiy asarni yozishda xalifa al-Ma’mun davrida ilm-fanga bo‘lgan e’tibor va homiylikdan katta ilhom olganini ta’kidlagan.

Markaz ekspozitsiyasida asarning ilmiy qimmati, tarixiy ahamiyati, turli tillardagi nashr va tarjimalari haqida ham ma’lumotlar joy olgan.

Islom sivilizatsiyasi markazining bu tashabbusi nafaqat milliy merosimizni targ‘ib qilish, balki jahon ilm-faniga o‘z hissasini qo‘shgan ajdodlarimiz ilmiy merosini qayta tiklash yo‘lida muhim qadam hisoblanadi.

• Geologiya
• Islom
• Kitob
• ilm-fan