JSST tahliliga ko‘ra, dunyo bo‘yicha har sakkiz kishidan biri semizlikdan aziyat chekadi. Qolaversa, 18 yosh va undan katta aholi orasida 2,5 milliard odam ortiqcha vaznga ega.

Bu esa ko‘plab kasalliklarni keltirib chiqaruvchi omildir. Tanada ortiqcha yog‘ to‘planishi, ayniqsa, yurak faoliyati uchun juda zararli.

“Har bir hujayra uchun kislorod va ozuqa zarur. Shuning hisobidan organizmda qon aylanishi yaxshilanadi. Yurak me’yorida urib, tana bo‘ylab yetarli miqdorda qon haydaydi” - deydi Respublika ixtisoslashtirilgan kardiologiya ilmiy-amaliy tibbiyot markazi maslahat poliklinikasi mudiri Oybek O‘rinov.

Bunday vaziyatda doimiy zo‘riqish yurak mushaklarini toliqtiradi. Oqibatda uning hajmi kattalashadi. Ko‘pincha “asosiy nasos” vazifasini o‘tovchi chap qorincha aziyat chekadi va uning gipertrofiyasi boshlanadi.

Odatda, qorincha kengayishi birdan noxush alomatlarga olib kelmasa-da, vaqt o‘tishi bilan u qonni samarali haydash qobiliyatini yo‘qotadi. Natijada yurak yetishmovchiligi xavfi ortadi.

Ushbu a’zo atrofida va ichida hosil bo‘lgan yog‘ o‘zidan miokard yallig‘lanishiga olib keluvchi moddalar ajratadi. Oqibatda aritmiya(yurakning qisqarish ritmining buzilishi) ehtimoli yuzaga keladi.

Shuningdek, yog‘ to‘qimalari qon tomirlarini toraytirish va organizmda natriy saqlash xususiyatiga ega moddalarni ishlab chiqaradi. Bu esa qon bosimini oshirib, gipertenziya rivojlanishiga turtki bo‘ladi.

Bundan tashqari, semirib ketgan odamlarda ko‘pincha xolesterin va triglitserid miqdori ko‘payib, arteriyalarning ichki devorlarida tiqinlar hosil qiladi, qon tomirlarini toraytiradi.

Qolaversa, semizlik natijasida yurakda kislorod yetishmasligi(ishemiya) yuzaga keladi. Bu holat infarkt, stenokardiya va boshqa jiddiy xastaliklarga olib kelishi mumkin.

Yana bir fakt shuki, semiz odamlarda insulinga nisbatan sezgirlik kamayadi. Mazkur holat qandli diabetning 2-turi paydo bo‘lishiga olib kelishi mumkin. Bu esa yurak-qon tomir kasalliklarining rivojlanishini tezlashtiradi.

Shuni unutmaslik kerakki, tana vaznining, hatto, 5-10 foizga kamayishi ham yurak-qon tomir tizimidagi zo‘riqishni sezilarli darajada pasaytiradi va salomatlikni yaxshilaydi.

Chunki semizlik — faqat estetik muammo emas. U yurak va butun qon aylanish tizimi uchun jiddiy xavf manbaidir. Vaznni nazorat qilish, sog‘lom ovqatlanish va jismoniy faollik bunday xastaliklarning oldini olishda muhim rol o‘ynaydi.

• JSST
• Kasallik
• Qon-tomirlar
• Yurak