Qoshlar yuz go‘zalligining bir bo‘lagi. Shu sabab ayollarimiz qoshlariga alohida e’tibor berib, chiroyli shaklga keltirib yurishni xush ko‘rishadi. Ammo hamma ham emas! 

Ayrimlar bu ishni o‘zlari mustaqil bajara olmaydi yoki bajarganda ham kutilgan natijaga erishmaydi. Nima uchun? Ular qoshni to‘g‘ri bo‘yashni bilishmaydi, xolos. Ushbu maqolamizda 8 ta layfxak bilan qoshlarga go‘zal ko‘rinish hadya etish haqida ma’lumot beramiz.

1.  Qoshlarni bo‘yash uchun ko‘zgudan biroz uzoqroq turiladi. Bu holatda siz qoshlarni simmetrik to‘g‘ri bo‘yaysiz va yuzning umumiy gormonik shaklini yaratasiz.
2.  Qoshning tashqi burchagi ko‘zning tashqi burchaklarigacha davom etishi, ichki burchagi esa ko‘zning ichki burchagidan boshlanishi kerak. 
3.   Qoshlarga to‘qroq rang bermoqchi bo‘lsangiz, bo‘yoq surtuvchi cho‘tkani avval suvda ho‘llab oling. Bo‘yoq nam cho‘tkada surtilsa, u tekis va to‘q rangni hosil qiladi.
4.  Qoshni qalamda bo‘yashni ham to‘g‘ri bajaring. Qalamni bosib va bo‘rttirib bo‘yash notabiiy qoshlar paydo bo‘lishiga asosiy sababdir. Qalam yengil harakatlar bilan tuklarning o‘sishi bo‘ylab, qisqa-qisqa chiziqlar chizilib bo‘yaladi.  

5.  Tarvaqaylab o‘sgan qoshlarga kerakli shakl berish uchun pinsetdan (qosh teruvchi moslama) foydalanasizmi? Pinsetda tuklarni yulishdan avval teriga sovuq kompress yoki muz bo‘lagi qo‘yiladi. Bu vositalar yulish vaqtida og‘riq hissini “o‘tmaslashtiradi”. Muolajadan so‘ng yana sovuq vosita qo‘yiladi.
6.  Qoshlarni rangi ochroq qalamda bo‘yab, so‘ng ustidan tush “yurgizilsa”, ular yana-da chiroyli ko‘rinadi.
7.  Qoshlardagi bo‘yoqni qotirmoqchi bo‘lsangiz, soch geli yoki soch lakidan foydalaning. Vositalardan biri tush cho‘tkasiga surtiladi va qoshlar taraladi.
8.  Qoshlarni o‘stirish uchun kanakunjut moyidan foydalangan ma’qul.