27-noyabr kuni Buyuk Britaniya poytaxti London shahrida turli mamlakatlarning investitsiya salohiyatiga bag‘ishlangan xalqaro forum bo‘lib o‘tadi. Londondagi sammit yevropalik sarmoyadorlar va ishbilarmon doiralarning manfaatdor vakillarini birlashtiradi. 
Rivojlanayotgan bozorlar orasida investitsiya salohiyatini jalb qilish va rivojlantirish bo‘yicha o‘tkaziladigan forumda O‘zbekiston vakillari ham ishtirok etadi. 

Londondagi “Adam Smith Conferences” va “Eurasian Investor” tomonidan taqdim etilayotgan “UzInvest” forumi O‘zbekiston Investitsiyalar va tashqi savdo vazirligi bilan hamkorlikda o‘tkaziladi. Bu O‘zbekistonda xususiy sektor tashabbusi doirasida boshlangan birinchi yirik xalqaro investitsiya forumi bo‘ladi. 

“UzInvest” forumi Yevropaning barcha mintaqalaridan kelgan delegatlarni ishbilarmonlik uchrashuvlari hamda Yevropa investorlarini Markaziy Osiyodagi eng gavjum mamlakat – O‘zbekistonga taklif qiladi. 

“Eurasia Investor” asoschisi Isfandiyar Batmangelijning ta‘kidlashicha, “UzInvest” forumining o‘tkazilishi O‘zbekistonda iqtisodiy islohotlarning birinchi bosqichi tugaganini va keyingi muhim bosqichni boshlashga tayyorligini anglatadi. 

“… iqtisodiy islohotlarning ikkinchi bosqichiga o‘tish uchun O‘zbekiston bozoriga ko‘proq xorijiy kompaniyalar va investorlarni jalb qilish kerak. Biz ushbu ikkinchi bosqichni boshlashga yordam bermoqchimiz”, deydi Isfandiyar Batmangelij. 

Londonda joylashgan “Sturgeon Capital” kompaniyasi bosh direktori, “UzInvest” forumi homiylaridan biri Kiyan Zandie, sarmoyadorlar orasida O‘zbekistonga bo‘lgan qiziqish tobora ortib borayotganini ta‘kidlaydi: “Biz ishonamizki, mamlakat taqdim etayotgan imkoniyatlar to‘g‘risida xabardorlik oshgani sayin investorlar qiziqishi ham yanada oshadi”, deydi Kiyan Zandie. 

Eslatib o‘tamiz “UzInvest” forumi Londonning moliyaviy markazidan unchalik uzoq bo‘lmagan tarixiy joy – “Glaziers Hall”da bo‘lib o‘tadi. Ushbu forumning asosiy moliyaviy hamkori “Orient Finans Bank” XATB, aloqa hamkori esa “Dinara & Co.” tashkilotidir. 

Ma’lumot uchun, “Adam Smith Conferences” – bu bozorda yetakchi biznes-media kompaniyasi bo‘lib, MDH mamlakatlarida sarmoyaviy sammitlarni tashkil etishda 25 yillik tajribaga ega. 

Xabardor.uz