1991-yilning 18-noyabrida O‘zbekiston Respublikasining Davlat bayrog‘i tasdiqlangan edi.  Bayrog‘imizdagi ranglar va belgilarning mazmuni haqida hammamiz bilamiz. Keling, dunyo bayroqlari haqidagi eng qiziqarli faktlar bilan tanishamiz. 

•  Ko‘plab davlat bayroqlari 2:3 yoki 1:2 nisbatdagi to‘rtburchak o‘lchamiga ega. Ammo Yevropa davlatlaridan: Vatikan va Shveysariyning bayroqlari kvadrat shaklida. Nepal bayrog‘i esa ustma-ust birlashtirilgan ikki uchburchakdan iborat.  

•  Davlat bayroqlarida qo‘llaniladigan eng mashhur ranglar qizil, oq va ko‘k ranglar hisoblanadi. Faqatgina shu uchtalikdan iborat bo‘lgan bayroqlar sirasiga Rossiya, Fransiya, AQSh, Buyuk Britaniya, Avstraliya, Yangi Zelandiya, Niderlandiya, Serbiya, Tailand va yana boshqa davlatlarniki kiradi. 

•  Eng kam ishlatiladigan ranglar uchligi esa: sariq, qora va yashil. Ular Ispaniya, Germaniya, Italiya, Vatikan kabilarnikida bor. 

•  2011-yilning oktabrigacha eng oddiy (bitta rangdan iborat) bayroq Liviya bayrog‘i edi, ammo Kaddafiyning rejimi qulashidan so‘ng, yashil to‘rtburchak davlat ramzi bo‘lmay qoldi.  

•  Eng o‘zgaruvchan bayroq. Filippin bayrog‘idagi ranglar joy almashib turadi: harbiy davrlarda yuqori chiziq – qizil, pastagisi – ko‘k bo‘ladi. 

•  Janubiy Xoch yulduzlar to‘plami. Faqatgina ekvatordan pastda ko‘rinadigan tungi janubiy osmonning eng mashhur yulduzlari to‘plami bir nechta davlat bayrog‘ida: Braziliya, Papua Yangi Gvineya, Avstraliya, Yangi Zelandiya, Samoa, Tokelaunikida aks etgan.  

•  Oy (yarim oy) tasviri asosan musulmon davlatlari: Turkiya, Azarbayjon, Turkmaniston, Jazoir, Mavritaniya, Singapur, Malayziya, Pokiston, Tunis va O‘zbekiston bayrog‘ida bor. 

•  Quyosh esa turli-tuman davlatlarning bayrog‘ida turlicha ko‘rinishda aks etgan. Masalan, Argentina va Urugvay bayrog‘ida nurli yuz, Yaponiya, Bangladesh, Niger davlatlari bayrog‘ida aylanacha, Gvineya bayrog‘ida esa shunchaki qiziq va yashil chiziqlar orasidagi vertikal sariq chiziq sifatida tasvirlangan. Kiribati, Malavi, Tayvan ham quyoshni o‘z ramzi sifatida tanlagan. 

•  Skandinav xochi Shimoliy Yevropa davlatlaridan Daniya, Islandiya, Norvegiya, Finlyandiya, Shvetsiya bayroqlarida bor. 

•  Ikki tomonli bayroq. Paragvay bayrog‘ining ikki tomoni bor. Old tomonida yulduzlar va “Republica del Paraguay” yozuvi, orqasida esa sher va “Paz Y Justicia” – “Tinchlik va adolat” shiori aks etgan.