Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi matbuot kotibi Hikmatilla Ubaydullayev oʻzining Telegram’dagi rasmiy kanalida maʼlum qilishicha, ijtimoiy tarmoqlarda muhokama qilinayotgan jurnalistning umummilliy guvohnomasini joriy etish masalasi koʻrib chiqilmoqda. 

Haqiqatan ham, Prezidentning 2-fevraldagi qarori bilan tasdiqlangan 2019-2020-yillarda Oʻzbekistonda axborot sohasini rivojlantirish boʻyicha Dasturda Axborot va ommaviy kommunikatsiyalar agentligi (AOKA) tomonidan jurnalistning umumeʼtirof etilgan milliy guvohnomasi joriy etilishi belgilangan edi.

“Shuni maʼlum qilamanki, Agentlik mazkur masala yuzasidan tegishli hujjat loyihasini allaqachon ishlab chiqqan va loyiha ayni paytda Adliya vazirligi tomonidan koʻrib chiqilmoqda.

Mazkur hujjat qabul qilingandan soʻng Axborot va ommaviy kommunikatsiyalar agentligining gologramma muhri bilan tasdiqlangan ID karta jurnalistlarga bepul taqdim etiladi”, deyiladi Agentlik kotibining Telegram’dagi kanalida.