Markaziy bank Humo va Uzcard to‘lov tizimlarining joriy yildagi o‘zaro integratsiyalashuvi birinchi bosqichini yakunlanganini maʼlum qilmoqda.

Endilikda har ikkala tizim terminallarida to‘lovlarni qabul qilish amaliyoti joriy qilinadi. Yaʼni, ilgari terminallarda cheklovlar mavjud bo‘lgan bo‘lsa, endilikda bitta terminalda ham Humo, ham Uzcard kartalariga xizmat ko‘rsatish mumkin bo‘ladi.

MB xabariga ko‘ra, terminal har ikkala turdagi kartalarni qabul qilishni boshlashi uchun uni yangilash kerak va yaqin vaqt ichida banklarga bunday yangilashni amalga oshirish uchun zarur ko‘rsatmalar beriladi.

Shuningdek, integratsiya memorandumi doirasida Humo va Uzcard quyidagi yo‘nalishlarda hamkorlikni davom ettirishi aytildi:

– karta egalari, banklar, to‘lov tashkilotlari va chakana savdo shoxobchalarining manfaatlarini himoya qilish;

– texnologiyalarni takomillashtirish va naqd pulsiz hisob-kitoblarni rag‘batlantirish infratuzilmasini kengaytirish;

– to‘lov infratuzilmasining ishonchliligi va axborot xavfsizligini taʼminlash bo‘yicha loyihalarni amalga oshirish.