“Putin bilan suhbatim yakunlandi. Menimcha, u juda yaxshi o‘tdi. Rossiya va Ukraina darhol o‘t ochishni to‘xtatish va, bundan ham muhimrog‘i, urushni to‘liq yakunlash bo‘yicha muzokaralarni boshlaydi. Shartlar ikki tomon o‘rtasida kelishiladi, shunday bo‘lishi kerak, chunki muzokara jarayonining tafsilotlarini faqat ular biladi, bu boshqa hech kimga ma’lum emas. Suhbat ohangi va ruhi yaxshi edi. Agar aksincha bo‘lganida, men hoziroq buni ochiqcha aytgan bo‘lar edim.

Rossiya ushbu halokatli “qonli qirg‘in” yakunlanganidan so‘ng Qo‘shma Shtatlar bilan keng ko‘lamli savdo aloqalarini yo‘lga qo‘ymoqchi va men bu g‘oyani qo‘llab-quvvatlayman. Rossiyada ish o‘rinlari yaratish va farovonlikni oshirish uchun ulkan imkoniyatlar mavjud. Uning salohiyati cheksiz. Ukraina ham o‘z mamlakatini tiklash jarayonida savdo aloqalaridan katta foyda olishi mumkin.

Rossiya va Ukraina o‘rtasidagi muzokaralar darhol boshlanadi. Men bu haqda Ukraina prezidenti Volodimir Zelenskiyga, Yevrokomissiya prezidenti Ursula fon der Lyayenga, Fransiya prezidenti Emmanuyel Makronga, Italiya bosh vaziri Jorja Meloniga, Germaniya kansleri Fridrix Mersga va Finlyandiya prezidenti Aleksandr Stubbga Putin bilan suhbatdan so‘ng telefon orqali xabar berdim.

Rim papasining so‘zlariga ko‘ra, Vatikan bu muzokaralarni o‘z hududida o‘tkazishga katta qiziqish bildirgan. Jarayon boshlansin!”, — deb yozdi AQSh rahbari Truth Social ijtimoiy tarmog‘idagi sahifasida.

• AQSh
• Putin
• Rossiya
• Tramp
• Ukraina
• Zelenskiy