Фарғоналик аёл Ўзбекистоннинг энг кекса фуқароси деб тан олинди: у 1895 йилда туғилган.

Хувайдо Умарова дунёдаги энг кекса инсон сифатида Гиннеснинг рекордлар китобига киритилиши мумкин.

Адлия вазирлиги матбуот хизматининг хабарига кўра, Фарғона вилоятида 130 ёшли аёлнинг туғилгани факти расман аниқланди.

“Ҳеч бир ҳужжатсиз қолмайди” тарғибот тадбирлари доирасида Қорақум маҳалласида Бувайда туман адлия бўлими ходимлари томонидан 1895 йилда туғилган Хувайдо Умарова (Тошматова)нинг туғилганлиги факти расман қайд этилмаганлиги аниқланди.

Туман адлия бўлими судга даъво аризаси киритиб, қаноатлантирилди.

Бувайда туман адлия бўлими томонидан киритилган даъво ариза қаноатлантирилиб, Фуқаролик ишлари бўйича Қўқон туманлараро судининг Бувайда тумани “Қорақум” МФЙда ўтказган сайёр суд мажлисида Ҳувайдо момонинг 1895 йил 1 январда Бувайда туманида туғилганлик факти белгиланди.

Хувайдо Умарова Ўзбекистондаги энг кекса инсон сифатида эътироф этилди. У Гиннеснинг рекордлар китобига дунёдаги энг ёши улуғ одам сифатида киритилиши мумкин.

• Фарғона