RBC нашрининг хабар беришича, россиялик миллиардер USM асосчиси Алишер Усмонов ARD журналисти Ханс-Йоахим Зеппельтга нисбатан жиноий иш қўзғатилишини сўраб ариза берган.

Бунга сабаб эса аввалроқ мазкур журналист Усмоновни Халқаро қиличбозлик федерациясида ҳакамларга пора бериш тизимини яратишда айблаган эди.

Октябрь ойи бошида Гамбург вилоят суди Зеппельтга қарши ишда Усмонов тарафини олган ва “шубҳага асосланган номақбул хабарлар” тарқатилишига қарши қарор чиқарган эди. Шундан сўнг, ARD телеканали журналист россиялик тадбиркорга қарши айбловлар қўйган хабарни ўчириб ташлаган.

Усмоновнинг адвокати маълум қилишича, 8 октябрь куни Усмонов ҳам Кёлн прокуратурасига Зеппельтга нисбатан жиноий иш қўзғатиш тўғрисида ариза топширган.

“Зеппельт ва ARD-Sportschau асосий журналистика стандартлари ва матбуот кодексини бузган. Қонунда бундай қабиҳ ғаразли гаплар учун жавобгарлик белгиланган. Зеппельт Усмоновнинг обрўсига путур етказишга уринди. Аммо унинг ҳеч қандай фактлари бўлмаган. Бу журналистика эмас, бу шармандалик”, – деган Усмоновнинг адвокати.

• Алишер Усмонов