Apple таъмирлаш вақтида ўғирланган қурилмаларнинг қисмлари ўрнатилган iPhone телефонларни блоклайди. Бу ҳақда 9to5Mac нашри хабар берди.

Қайд этилишича, янги функция 16 сентябрда чиқарилиши режалаштирилган iOS 18 да тақдим этилади.

Маълум бўлишича, эндиликда iPhone компонентларининг — батарея, камера, экран серия рақамлари ҳақидаги маълумотлар фойдаланувчи ҳисобига уланади.

Агар таъмирланган қурилма ёқилганда, ўрнатилган янги қисм Activation Lock ёки Lost Mode функциялари фаоллаштирилган iPhone’дан олинганлиги аниқланса, фойдаланувчи уни қулфдан чиқариш учун паролни киритиши шарт бўлади.

Маълумот учун, iOS 18 Apple бир неча кун олдин тақдим этилган янги iPhone 16 серияли моделларида олдиндан ўрнатилади. Уларнинг сотуви 20 сентябрдан бошланади.

• Apple
• iPhone