Air Tashkent авиакомпанияси директори ўринбосари Анвар Сулаймонов “Ўзбекистон 24” телеканалига берган интервюсида Ўзбекистонга Switchblade русумидаги учар таксилар 2028-йилдан 2030-йилгача олиб келинишини маълум қилди. Билдирилишича, ҳозирги пайтда АҚШнинг Samson Sky компанияси билан сертификатлаш жараёни кетмоқда. Air Tashkent'нинг 10 дан ортиқ ходими Samson Sky компаниясида малака ошириб қайтгач, техник хизмат кўрсатиш бўйича фаолият юритади.

“Air Tashkent билан Samson Sky имзолаган шартномага асосан, уч турда маҳсулотни чиқаришни режалаган. Биринчи турдаги бу бензинли двигателимиз. Иккинчи бу электр двигателимиз. Учинчи бу қуёш панели билан ҳаракатланадиган учар такси. Учар таксилар 800 километргача учиши мумкин. Масалан, олайлик, шу Тошкентдан учди, уч соатда, тўрт соатда Урганчда бўлишингиз мумкин”, – деди Анвар Сулаймонов.

Унинг сўзларига кўра, учар таксининг сиғими уч кишидан етти кишигача бўлади. 130 метрлик жой бўлса, у учар таксига айланади. Бундай транспорт ҳавога кўтарилиши учун 3 дақиқани ташкил этади. Учар такси ичида совитиш тизими, навигатсия тизими ҳамда автопилот тизими мавжуд.

“Бу учар таксимиз муҳит танламайди, ҳар қандай об-ҳаво шароитларида учиши мумкин. Автопилот тизими орқали учар такси ҳайдовчисиз учиши мумкин. Лекин хавфсизлик нуқтаи назаридан, ҳайдовчи пултда ўтириши шарт”, – дея қўшимча қилди Аир Ташкент авиакомпанияси директори ўринбосари.

Феврал ойида Air Tashkent АҚШнинг Samson Sky компаниясидан 300 та Switchblade русумли учувчи автомобил сотиб олиш бўйича келишувга эришилган эди. Маълумот учун, Samson Sky – АҚШнинг Орегон штатида жойлашган инновацион технология компанияси бўлиб, учувчи автомобиллар ишлаб чиқиш билан шуғулланади.

• АҚШ
• Автомобил
• Ҳамкорлик
• Ўзбекистон