АҚШ Президенти Доналд Трамп Украина етакчиси Владимир Зеленский билан келишувга эришиш Россия Президенти Владимир Путин билан келишишга нисбатан анча қийин эканини билдирди. Бу ҳақда у NBC News’га берган интервьюсида айтган.

Трампнинг таъкидлашича, у Зеленскийнинг келишув тузишни истамаётганидан ҳайратда.

“Зеленский нега келишув тузишни истамаётганидан ҳайронман. Зеленскийга айтинглар, у келишув тузсин, чунки Путин келишувга тайёр”, – деган Трамп.

Телеканалга кўра, Трампнинг бу баёнотлари АҚШ томонидан Россия нефтига нисбатан қўлланган айрим санкциялар юмшатилганидан кейин жаҳон етакчилари томонидан билдирилган танқидлар ортидан янграган. Вашингтон бу қадамни жаҳонда нефть нархларининг кескин ошишини юмшатиш мақсадида амалга оширган.

Март ойи бошида Владимир Зеленский Украина ҳарбийларининг Россия дронларини йўқ қилиш тажрибасидан фойдаланиб, АҚШ ва унинг иттифоқчиларига Яқин Шарқда Эрон дронларини тутишда ёрдам беришни таклиф қилган эди. Бироқ Трамп интервью давомида “бизга ёрдам керак эмас” деб жавоб бериб, “бизга ёрдами керак бўлмаган энг охирги одам – бу Зеленский”, – деб қўшимча қилган.

Аввалроқ, март ойи бошида Трамп Зеленскийни Россия билан тинчликка эришиш йўлида тўсиқ деб атаганди. Трамп шу билан бирга Владимир Путин келишув тузишни истаётганини, Украина раҳбари эса бу борада етарлича тайёрлик кўрсатмаётганини айтган. Қўшма Штатлар раҳбари музокаралар жараёни давом этаётганини ҳам таъкидлаб ўтган.

• Интервю
• Музокара
• Путин
• Трамп
• Зеленский