Хитой компанияси “Аския” бозор комплекси учун 225 млрд сўмлик савдоларда ғолиб чиқди. Ушбу аукцион 15 дақиқа давом этган ва битта таклифдан сўнг якунланган. Тендерда ғолибликни Sheng - Ke International компанияси қўлга киритган.

Қайд этилишича, компания 225 млрд 595 млн сўм белгиланган бошланғич нархидан 5 фоиз кўпроқ таклиф қилган.

Маълумотларга кўра, ушбу компания 2024 йил май ойида рўйхатдан ўтган. Устав фонди эса 68 млрд сўмни ташкил этади. У ихтисослаштирилган қурилиш ишлари билан шуғулланади.

Эслатиб ўтамиз, инвесторга қуйидаги талаблар қўйилган эди:

– майдони камида 3000 квадрат метр бўлган экобозор қуриш;

– камида 1200 квадрат метр майдонга эга совутгич омборини қуриш;

– ерости автотураргоҳининг биринчи қаватини (камида 400 ўринли) компания мулкига бепул ўтказиш.

Ушбу лойиҳа катта савдо мажмуасини ўз ичига олади. Ҳудудида велосипед парклари ва замонавий скамейкалар, Wi-Fi зоналари, аҳоли учун дам олиш жойлари, ногиронлар учун эскалаторлар ва яшил майдонлар мавжуд бўлади.

Бундан ташқари, янги бозор ёнида 4 юлдузли меҳмонхона қурилади.

Лойиҳа давомида 1000 дан ортиқ янги иш ўринлари яратилиши кутилмоқда.

• Бозор
• Тошкент