АҚШ президенти Жо Байден ва Германия канцлери Олаф Шольц Россияни Украинада содир бўлаётган воқеалар учун жавобгарликка тортишга тайёрлигини билдирди. Бу ҳақда Оқ уй баёнотида маълум қилинди.

“Улар Россияни тажовузкорлиги учун жавобгарликка тортиш мажбуриятини яна бир бор тасдиқладилар”, – дейилади баёнотда.

Оқ уй баёнотида, шунингдек, Байден ва Шольц Украинани гуманитар, иқтисодий, сиёсий ва хавфсизлик жиҳатларида қўллаб-қувватлаш, шунингдек, украиналиклар билан халқаро бирдамликни сақлаш муҳимлигини муҳокама қилгани айтилади.

Қайд этиш мумкин, бугун, 4 март куни Байден ва Шольц Вашингтондаги шахсий учрашуви доирасида Украинага қурол етказиб бериш масаласини муҳокама қилди. Оқ уй матбуот хизматига кўра, учрашув Россиянинг Украина ҳудудида махсус ҳарбий операцияси бошланганининг бир йиллиги муносабати билан ўтказилган.

Россия Федерацияси Президентининг матбуот котиби Дмитрий Песков журналистлар билан бўлиб ўтган брифингда АҚШ Украинага қурол-яроғ етказиб беришни кўпайтиришда давом этишини ва унинг “қўл остидаги”лар – ЕИ мамлакатларини ҳам бунга ундашини айтди.

• АҚШ
• Германия
• Россия
• Украина