Ижтимоий тармоқларда Бухорода вояга етмаганларнинг тўй маросими акс этган видео тарқалди. Болалар омбудсманининг айтишича, ҳолат алоҳида кузатувга олинган.

Ушбу ўрганиш давомида аниқланишича, 2008 йилда Шофиркон туманида туғилган йигит ва 2007 йилда Қоракўл туманида туғилган қизнинг ўртасида иккала вояга етмаганнинг оилалари ўзаро келишуви асосида жорий йилнинг 29 июнь куни Бухоро шаҳрида никоҳ тўйи бўлиб ўтган.

Шунингдек, мазкур ҳолат юзасидан Қоракўл туман ИИБ ҳузуридаги тергов гуруҳи томонидан терговга қадар текширув ҳаракатлари олиб борилган.

Қайд этилишича, вояга етмаганларнинг ота-оналари МЖтКнинг 47-3 моддаси (Никоҳ ёши тўғрисидаги қонунчиликни ёки никоҳ тузиш тартибини бузиш) билан маъмурий жавобгарликка тортиш юзасидан ҳужжатлар судга юборилган.

Ўзбекистон Республикаси Оила кодексининг 15-моддасига асосан, никоҳ ёши эркаклар ва аёллар учун 18 ёш этиб белгиланган.

Бу қонуний талабнинг бузилиши боланинг таълим олиш, соғлиғини сақлаш ҳамда жисмоний, ақлий ва маънавий уйғун равишда камол топиши ҳуқуқларига мутлақо зид ҳисобланади.

• Бухоро
• Омбудсман