Тошкент вилоятида зарарли дастурларни сотиш билан шуғулланган шахс фаолиятига чек қўйилди. Давлат хавфсизлик хизмати, Тошкент шаҳар ИИББ ҳамда “Киберхавфсизлик маркази” мутахассислари ҳамкорлигида ўтказилган тезкор тадбир давомида у қўлга олинди.

Маълум бўлишича, Чирчиқ шаҳрида яшовчи 2005 йилда туғилган фуқаро ўзи яратган зарарли “APK” дастурларни Telegram орқали 100–300 минг сўм эвазига камида 10 нафар фойдаланувчига сотган. У харидорларга техник ёрдам кўрсатиб, дастурлардан фойдаланиш бўйича маслаҳатлар ҳам бериб келган.

Аниқланишича, ушбу дастурлар орқали бошқаларнинг Telegram аккаунтларига ноқонуний кириш, телефонлардаги SMS-хабарларни ўқиш ҳамда тўлов тизимларидаги маблағларни ўзлаштириш мумкин бўлган.

Шунингдек, гумонланувчи Telegram’даги 5 дан ортиқ гуруҳ ва каналларга администраторлик қилиб, уларда зарарли дастурларни тарғиб қилган.

Тезкор тадбир давомида ундан “Asus ExpertBook” ноутбуки, “Redmi Note 10 Pro” телефони, қаттиқ диск ҳамда банк карталари ашёвий далил сифатида мусодара қилинди.

Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.