Наманган вилоятида банклардан бирининг бош юристконсулти хизмат мавқеидан фойдаланиб, ноқонуний даромад олишга уринган.

Маълум қилинишича, у Наманган шаҳридаги хусусий тиббий клиникалардан бирига тегишли 16,2 млрд сўмлик кредит бўйича гаров мулкларини ауксион савдоларига чиқаришни 5–6 ойга кечиктириб бериш ҳамда кейинчалик уларни қайтаришда ёрдам бериш эвазига 3 минг АҚШ доллари талаб қилган.

Давлат хавфсизлик хизмати ва Иқтисодий жиноятларга қарши курашиш департаменти ҳамкорлигида ўтказилган тезкор тадбирда у сўралган пулни олаётган вақтида ашёвий далиллар билан қўлга олинган.

Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.